ek KHushi ke liye hain kitne gham

ik ḳhushī ke liye haiñ kitne ġham

mubtalā-e-sad-ārzū haiñ ham

dil bhī lauh-o-qalam kā ham-sar hai

dāstāneñ haiñ kitnī dil pe raqam

azmat-e-raftagāñ hai nazroñ meñ

apne maazī ko DhūñDte haiñ ham

paara paara hai ḳhud junūñ lekin

fikr-e-insāñ isī se hai mohkam

bhīgī bhīgī hai har kiran un kī

hai sitāroñ kī aañkh bhī pur-nam

yuuñ na hotī sahar kī rusvā.ī

kaash khultā na raushnī kā bharam

ham haiñ aur ehtirām-e-husn-e-vafā

vo haiñ aur ehtimām-e-mashq-e-sitam

kamtar us ko na kahiye 'yazdānī'

aadmī ḳhud hai jān-e-do-ālam

ek KHushi ke liye hain kitne gham

mubtala-e-sad-arzu hain hum

dil bhi lauh-o-qalam ka ham-sar hai

dastanen hain kitni dil pe raqam

azmat-e-raftagan hai nazron mein

apne mazi ko DhunDte hain hum

para para hai KHud junun lekin

fikr-e-insan isi se hai mohkam

bhigi bhigi hai har kiran un ki

hai sitaron ki aankh bhi pur-nam

yun na hoti sahar ki ruswai

kash khulta na raushni ka bharam

hum hain aur ehtiram-e-husn-e-wafa

wo hain aur ehtimam-e-mashq-e-sitam

kamtar us ko na kahiye 'yazdani'

aadmi KHud hai jaan-e-do-alam