ek mehrban ki yaad satae to kya karen

ik mehrbāñ kī yaad satā.e to kyā kareñ

shab bhar ḳhayāl us kā jagā.e to kyā kareñ

ham haiñ shabān-e-hijr ke maare hameñ koī

qisse visāl ke jo sunā.e to kyā kareñ

maanā ki shai burī hai magar phir bhī jab koī

le kar tumhārā naam pilā.e to kyā kareñ

bārish ho mai-kada bhī ho mausam bhī sard ho

aise meñ terī yaad bhī aa.e to kyā kareñ

ham ko bhī hai gurez magar naaz se hameñ

saaqī nazar milā ke pilā.e to kyā kareñ

pās-e-adab kī baat bhī hotī hai shaiḳh jī

mahfil meñ yaar jaam thamā.e to kyā kareñ

chalte haiñ 'shān' ham bhī haram ko magar vahāñ

zamzam bhī tishnagī na miTā.e to kyā kareñ

ek mehrban ki yaad satae to kya karen

shab bhar KHayal us ka jagae to kya karen

hum hain shaban-e-hijr ke mare hamein koi

qisse visal ke jo sunae to kya karen

mana ki shai buri hai magar phir bhi jab koi

le kar tumhaara nam pilae to kya karen

barish ho mai-kada bhi ho mausam bhi sard ho

aise mein teri yaad bhi aae to kya karen

hum ko bhi hai gurez magar naz se hamein

saqi nazar mila ke pilae to kya karen

pas-e-adab ki baat bhi hoti hai shaiKH ji

mahfil mein yar jam thamae to kya karen

chalte hain 'shan' hum bhi haram ko magar wahan

zamzam bhi tishnagi na miTae to kya karen