ek na ek shaKH tamanna ki hari rahti hai

ik na ik shāḳh tamanna kī harī rahtī hai

phuul mil jaa.e to kāñToñ kī kamī rahtī hai

dast-e-qābū se bahut duur nikal jaatī hai

dil meñ jo hasrat-e-nākām dabī rahtī hai

aisā lagtā hai ki duniyā ne satāyā hai bahut

har dam us shaḳhs ke hoñToñ pe hañsī rahtī hai

‘adl-o-insāf shahanshāh ke aivāñ meñ kahāñ

dekhne ke liye zanjīr lagī rahtī hai

terī yādoñ ke sivā kaun yahāñ aatā hai

kis kī ḳhushbū mire kamre meñ basī rahtī hai

'ishq har aan havādis meñ ghirā rahtā hai

husn vāloñ ko mohabbat kī paḌī rahtī hai

guzar-auqāt kī kyā pūchh rahe ho 'irfān'

din guzarte haiñ magar raat khaḌī rahtī hai

ek na ek shaKH tamanna ki hari rahti hai

phul mil jae to kanTon ki kami rahti hai

dast-e-qabu se bahut dur nikal jati hai

dil mein jo hasrat-e-nakaam dabi rahti hai

aisa lagta hai ki duniya ne sataya hai bahut

har dam us shaKHs ke honTon pe hansi rahti hai

‘adl-o-insaf shahanshah ke aiwan mein kahan

dekhne ke liye zanjir lagi rahti hai

teri yaadon ke siwa kaun yahan aata hai

kis ki KHushbu mere kamre mein basi rahti hai

'ishq har aan hawadis mein ghira rahta hai

husn walon ko mohabbat ki paDi rahti hai

guzar-auqat ki kya puchh rahe ho 'irfan'

din guzarte hain magar raat khaDi rahti hai