ek nae unwan se tamir-e-jahan karte hain hum

ik na.e unvāñ se ta.amīr-e-jahāñ karte haiñ ham

aaj har qatre ko bahr-e-be-karāñ karte haiñ ham

ishq meñ kab imtiyāz-e-īñ-o-āñ karte haiñ ham

jis se karte haiñ mohabbat be-gumāñ karte haiñ ham

sa.ī kuchh karte bhī haiñ to rā.egāñ karte haiñ ham

jo hameñ lāzim hai 'tālib' vo kahāñ karte haiñ ham

bijliyāñ be-tāb hotī haiñ jalāne ke liye

jab kabhī qasd-e-binā-e-āshiyāñ karte haiñ ham

jazba-e-mehr-o-vafā kī āzmā.ish shart hai

imtihāñ tum le chuke ab imtihāñ karte haiñ ham

shukriya bhī log kah sakte haiñ shikva bhī ise

iḳhtiyār aisā kuchh andāz-e-bayāñ karte haiñ ham

phir kisī nā-mehrbāñ kī yaad taḌpāne lagī

phir kisī nā-mehrbāñ ko mehrbāñ karte haiñ ham

ārzūeñ hasrateñ māyūsiyāñ nākāmiyāñ

haiñ yahī unvāñ jo zeb-e-dāstāñ karte haiñ ham

pyaar kyuuñ aa.e na apnī fitrat-e-ma.asūm par

apne dushman ko bhī apnā rāz-dāñ karte haiñ ham

āñsuoñ se tāza-tar haiñ yād-e-yārān-e-qadīm

dāġh-hā-e-dil ko rashk-e-gulsitāñ karte haiñ ham

jab yahī īmāñ hai to phir kyā kisī se mashvara

mai-kade meñ bai.at-e-pīr-e-muġhāñ karte haiñ ham

raah se kyā kaam rahbar kī hameñ kyā ehtiyāj

be-nishāñ ho kar talāsh-e-be-nishāñ karte haiñ ham

ab ḳhudā jaane ki is meñ besh kyā hai kam hai kyā

dil nazar ehsās sab nazr-e-butāñ karte haiñ ham

ek nae unwan se tamir-e-jahan karte hain hum

aaj har qatre ko bahr-e-be-karan karte hain hum

ishq mein kab imtiyaz-e-in-o-an karte hain hum

jis se karte hain mohabbat be-guman karte hain hum

sai kuchh karte bhi hain to raegan karte hain hum

jo hamein lazim hai 'talib' wo kahan karte hain hum

bijliyan be-tab hoti hain jalane ke liye

jab kabhi qasd-e-bina-e-ashiyan karte hain hum

jazba-e-mehr-o-wafa ki aazmaish shart hai

imtihan tum le chuke ab imtihan karte hain hum

shukriya bhi log kah sakte hain shikwa bhi ise

iKHtiyar aisa kuchh andaz-e-bayan karte hain hum

phir kisi na-mehrban ki yaad taDpane lagi

phir kisi na-mehrban ko mehrban karte hain hum

aarzuen hasraten mayusiyan nakaamiyan

hain yahi unwan jo zeb-e-dastan karte hain hum

pyar kyun aae na apni fitrat-e-masum par

apne dushman ko bhi apna raaz-dan karte hain hum

aansuon se taza-tar hain yaad-e-yaran-e-qadim

dagh-ha-e-dil ko rashk-e-gulsitan karte hain hum

jab yahi iman hai to phir kya kisi se mashwara

mai-kade mein baiat-e-pir-e-mughan karte hain hum

rah se kya kaam rahbar ki hamein kya ehtiyaj

be-nishan ho kar talash-e-be-nishan karte hain hum

ab KHuda jaane ki is mein besh kya hai kam hai kya

dil nazar ehsas sab nazr-e-butan karte hain hum