ek pal baghair dekhe use kya guzar gaya

ik pal baġhair dekhe use kyā guzar gayā

aise lagā ki ek zamāna guzar gayā

sab ke liye buland rahe haath umr bhar

apne liye duāoñ kā lamha guzar gayā

koī hujūm-e-dahr meñ kartā rahā talāsh

koī rah-e-hayāt se tanhā guzar gayā

milnā to ḳhair us ko nasīboñ kī baat hai

dekhe hue bhī us ko zamāna guzar gayā

dil yuuñ kaTā huā hai kisī kī judā.ī meñ

jaise kisī zamīn se dariyā guzar gayā

is baat kā malāl bahut hai mujhe 'adīm'

vo mere sāmne se akelā guzar gayā

ham dekhne kā Dhañg samajhte rahe 'adīm'

itne meñ zindagī kā tamāshā guzar gayā

baaqī bas ek nām-e-ḳhudā rah gayā 'adīm'

sab kuchh bahā ke vaqt kā dariyā guzar gayā

ek pal baghair dekhe use kya guzar gaya

aise laga ki ek zamana guzar gaya

sab ke liye buland rahe hath umr bhar

apne liye duaon ka lamha guzar gaya

koi hujum-e-dahr mein karta raha talash

koi rah-e-hayat se tanha guzar gaya

milna to KHair us ko nasibon ki baat hai

dekhe hue bhi us ko zamana guzar gaya

dil yun kaTa hua hai kisi ki judai mein

jaise kisi zamin se dariya guzar gaya

is baat ka malal bahut hai mujhe 'adim'

wo mere samne se akela guzar gaya

hum dekhne ka Dhang samajhte rahe 'adim'

itne mein zindagi ka tamasha guzar gaya

baqi bas ek nam-e-KHuda rah gaya 'adim'

sab kuchh baha ke waqt ka dariya guzar gaya