ek raaz-e-dilruba ko bayan hona hai abhi

ik rāz-e-dilrubā ko bayāñ honā hai abhī

harf-o-sadā ko sho.ala-ba-jāñ honā hai abhī

jaagī hai dil meñ shahd-e-shahādat kī aarzū

rāh-e-vafā kā sañg-e-nishāñ honā hai abhī

rokā huā hai tum ne havāoñ ko kis liye

is raakh meñ sharar kā gumāñ honā hai abhī

sāñseñ shaboñ kī jaañ kī tanābeñ ukhaḌ ga.iiñ

agle safar pe ham ko ravāñ honā hai abhī

mahsūr hai vo kibr-o-anā ke hisār meñ

us se ta.āruf apnā kahāñ honā hai abhī

ta.abīr kī talāsh meñ phirte haiñ ḳhvāb ḳhvāb

chashm-e-jahāñ pe aks-fashāñ honā hai abhī

ek raaz-e-dilruba ko bayan hona hai abhi

harf-o-sada ko shoala-ba-jaan hona hai abhi

jagi hai dil mein shahd-e-shahadat ki aarzu

rah-e-wafa ka sang-e-nishan hona hai abhi

roka hua hai tum ne hawaon ko kis liye

is rakh mein sharar ka guman hona hai abhi

sansen shabon ki jaan ki tanaben ukhaD gain

agle safar pe hum ko rawan hona hai abhi

mahsur hai wo kibr-o-ana ke hisar mein

us se taaruf apna kahan hona hai abhi

tabir ki talash mein phirte hain KHwab KHwab

chashm-e-jahan pe aks-fashan hona hai abhi