ek ranj-e-umr de ke chala hai kidhar mujhe

ik rañj-e-umr de ke chalā hai kidhar mujhe

galiyoñ meñ rol deñ na mire bāl-o-par mujhe

dil parbatoñ ke paar na chal de havā ke saath

bādal banā na de mirī ḳhū-e-safar mujhe

maiñ ne jinheñ chhuā unheñ shahkār kar diyā

ai kaash chhū sake mirā dast-e-hunar mujhe

tum se bichhaḌ ke umr bhar ik soch hī rahī

kyā ho tum ek roz bhulā do agar mujhe

be-barg-o-bār kar ga.ī āñdhī mirā badan

ḳhush thā ye soch kar ki lage haiñ samar mujhe

ai dasht-dār dekh chaman-zār kī taraf

pag pag pukārte haiñ mire ham-safar mujhe

āzād kar 'najīb' giraftār-e-ramz ko

rañgoñ meñ khol ai mire rañg-e-hunar mujhe

ek ranj-e-umr de ke chala hai kidhar mujhe

galiyon mein rol den na mere baal-o-par mujhe

dil parbaton ke par na chal de hawa ke sath

baadal bana na de meri KHu-e-safar mujhe

main ne jinhen chhua unhen shahkar kar diya

ai kash chhu sake mera dast-e-hunar mujhe

tum se bichhaD ke umr bhar ek soch hi rahi

kya ho tum ek roz bhula do agar mujhe

be-barg-o-bar kar gai aandhi mera badan

KHush tha ye soch kar ki lage hain samar mujhe

ai dasht-dar dekh chaman-zar ki taraf

pag pag pukarte hain mere ham-safar mujhe

aazad kar 'najib' giraftar-e-ramz ko

rangon mein khol ai mere rang-e-hunar mujhe