ek roz dekh kar wo mujhe muskura diye

ik roz dekh kar vo mujhe muskurā diye

yāroñ ne itnī baat ke qisse sunā diye

chhappar uḌā ke le ga.ī ghar kā havā-e-tund

logoñ ne kuchh sutūn the vo bhī girā diye

pahle bulā ke ghar meñ kisī ne ba-sad-ḳhulūs

phir har nigāh par mirī pahre biThā diye

merā hī māl-o-zar sabhī apnoñ meñ baañT kar

ab kah rahe haiñ vo ki ḳhazāne luTā diye

tum ko mire vatan kī havāo salām hai

maiñ ne ravish ravish pe na.e gul khilā diye

ab bhī hamāre ghar meñ añdherā hai chār-sū

go ham ne apne azm ke sūraj ugā diye

ab tak na saaf aa.ī nazar koī shai 'kamal'

ghar meñ bujhe charāġh bhī ham ne jalā diye

ek roz dekh kar wo mujhe muskura diye

yaron ne itni baat ke qisse suna diye

chhappar uDa ke le gai ghar ka hawa-e-tund

logon ne kuchh sutun the wo bhi gira diye

pahle bula ke ghar mein kisi ne ba-sad-KHulus

phir har nigah par meri pahre biTha diye

mera hi mal-o-zar sabhi apnon mein banT kar

ab kah rahe hain wo ki KHazane luTa diye

tum ko mere watan ki hawao salam hai

main ne rawish rawish pe nae gul khila diye

ab bhi hamare ghar mein andhera hai chaar-su

go hum ne apne azm ke suraj uga diye

ab tak na saf aai nazar koi shai 'kamal'

ghar mein bujhe charagh bhi hum ne jala diye