ek sadgi nibhai hai tarz-e-suKHan ke sath

ik sādgī nibhā.ī hai tarz-e-suḳhan ke saath

saudā nahīñ kiyā hai kabhī fikr-o-fan ke saath

ye kyā ki baat baat pe bas dil-lagī kī baat

tum bhī to pesh aao kabhī apne-pan ke saath

dil meñ tire ḳhayāl se yuuñ raushnī huī

jaise ki sub.h aa.ī ho pahlī kiran ke saath

zaḳhmoñ kā chāñd dil kī tapish aur hayā ke rañg

ab sab chale ga.e haiñ tirī anjuman ke saath

miTTī kā qarz ham ne kuchh aise adā kiyā

dastār bhī utaar diyā pairahan ke saath

ab ke havā.eñ kaun sī rut le ke aa.ī haiñ

sahrā bhī pur-bahār hai ab ke chaman ke saath

ab ke girānī saarī hadeñ paar kar ga.ī

saude meñ ab zamīr bhī hai jān-o-tan ke saath

kaise zamāne terī ḳhudā.ī qubūl ho

rishte mire bahāl haiñ dār-o-rasan ke saath

aapas meñ uljhe rahte haiñ kyuuñ zehn aur zamīr

samjhauta donoñ kar hī chuke jab ki man ke saath

shāyad koī hasīn sā manzar ubhar ke aa.e

gardish meñ ab ke abr hai niile gagan ke saath

ek sadgi nibhai hai tarz-e-suKHan ke sath

sauda nahin kiya hai kabhi fikr-o-fan ke sath

ye kya ki baat baat pe bas dil-lagi ki baat

tum bhi to pesh aao kabhi apne-pan ke sath

dil mein tere KHayal se yun raushni hui

jaise ki subh aai ho pahli kiran ke sath

zaKHmon ka chand dil ki tapish aur haya ke rang

ab sab chale gae hain teri anjuman ke sath

miTTi ka qarz hum ne kuchh aise ada kiya

dastar bhi utar diya pairahan ke sath

ab ke hawaen kaun si rut le ke aai hain

sahra bhi pur-bahaar hai ab ke chaman ke sath

ab ke girani sari haden par kar gai

saude mein ab zamir bhi hai jaan-o-tan ke sath

kaise zamane teri KHudai qubul ho

rishte mere bahaal hain dar-o-rasan ke sath

aapas mein uljhe rahte hain kyun zehn aur zamir

samjhauta donon kar hi chuke jab ki man ke sath

shayad koi hasin sa manzar ubhar ke aae

gardish mein ab ke abr hai nile gagan ke sath