ek saya sa hai sath magar aashna nahin

ik saaya sā hai saath magar āshnā nahīñ

maiñ us ko aur vo mujhe pahchāntā nahīñ

ik vāqi.a hai ye ki vo dil meñ hai jāguzīñ

ik hādisa hai ye maiñ use jāntā nahīñ

ye aur baat hai ki zamāna hai mo'tarif

maiñ ḳhud to apne aap ko bhī māntā nahīñ

koī Thikāna merā na merī koī zamīñ

huuñ maiñ bhī lā-makāñ pe koī māntā nahīñ

vo zaḳhm zaḳhm kab hai jo ho jaa.e mundamil

vo dard dard hī nahīñ jo der-pā nahīñ

maanā ki us ke chāhne vaale nahīñ haiñ kam

merī tarah to koī use chāhtā nahīñ

da.avā vafā kā yuuñ to hai har shaḳhs ko 'zuhair'

ye vāqi.a hai koī bhī ahl-e-vafā nahīñ

ek saya sa hai sath magar aashna nahin

main us ko aur wo mujhe pahchanta nahin

ek waqia hai ye ki wo dil mein hai jaguzin

ek hadisa hai ye main use jaanta nahin

ye aur baat hai ki zamana hai mo'tarif

main KHud to apne aap ko bhi manta nahin

koi Thikana mera na meri koi zamin

hun main bhi la-makan pe koi manta nahin

wo zaKHm zaKHm kab hai jo ho jae mundamil

wo dard dard hi nahin jo der-pa nahin

mana ki us ke chahne wale nahin hain kam

meri tarah to koi use chahta nahin

dawa wafa ka yun to hai har shaKHs ko 'zuhair'

ye waqia hai koi bhi ahl-e-wafa nahin