ek sahra mein jaane kitne log hamare chhuT gae

ik sahrā meñ jaane kitne log hamāre chhūT ga.e

tab se aisā lagtā hai ki saare sahāre chhūT ga.e

kis dukh par ham Tuut ke ro.eñ kaun sā qissa batlā.eñ

aap faqat bas itnā jāneñ jaan se pyāre chhūT ga.e

in zaḳhmoñ kā marham le kar chaar masīhā aa.e the

is vahshat kī tārīkī meñ sab bechāre chhūT ga.e

hijrat vaalī raat balā kā dard sameTe hotī hai

un se jā kar pūchho jin ke rāj-dulāre chhūT ga.e

ik sāhir se rozāna maiñ is zid pe aḌ jaatā huuñ

vo nāTak dikhlāo jis meñ chāñd sitāre chhūT ga.e

kuchh saudāgar roz hamāre dard kā gāhak bante the

is chakkar meñ jaane kitne hausla haare chhūT ga.e

rafta-rafta 'āsif' ke sab yaar bichhaḌte jaate haiñ

pichhle shab kī ḳhvāb meñ bhī kuchh dard ke maare chhūT ga.e

ek sahra mein jaane kitne log hamare chhuT gae

tab se aisa lagta hai ki sare sahaare chhuT gae

kis dukh par hum Tut ke roen kaun sa qissa batlaen

aap faqat bas itna jaanen jaan se pyare chhuT gae

in zaKHmon ka marham le kar chaar masiha aae the

is wahshat ki tariki mein sab bechaare chhuT gae

hijrat wali raat bala ka dard sameTe hoti hai

un se ja kar puchho jin ke raj-dulare chhuT gae

ek sahir se rozana main is zid pe aD jata hun

wo naTak dikhlao jis mein chand sitare chhuT gae

kuchh saudagar roz hamare dard ka gahak bante the

is chakkar mein jaane kitne hausla haare chhuT gae

rafta-rafta 'asif' ke sab yar bichhaDte jate hain

pichhle shab ki KHwab mein bhi kuchh dard ke mare chhuT gae