ek sahra tha bas pani kahin tha na hawa thi

ik sahrā thā bas paanī kahīñ thā na havā thī

bin tere hayāt apnī baḌī saḳht sazā thī

ye sham'-e-mohabbat to kabhī bujhtī nahīñ hai

maiñ soch rahā huuñ ki kahāñ merī ḳhatā thī

aisā nahīñ duniyā thī hamesha hī se aisī

vo daur bhī thā jis meñ mohabbat thī vafā thī

dī vaqt ne dastak to mire dar pe ka.ī baar

dar jis ne na kholā vo mirī apnī anā thī

āsān na thā yuuñ rah-e-hastī se guzarnā

kyā jāniye kis kis kī mire saath du'ā thī

ham jis ko samajh baiThe the ai dost taġhāful

sunte haiñ ki us shoḳh kī vo ḳhaas adā thī

yūñhī nahīñ allāh pe laa.e haiñ yaqīñ log

insān ke hāthoñ meñ fanā thī na baqā thī

varna to ye mumkin hī nahīñ thā kabhī 'gulshan'

lagtā hai tabāhī meñ mirī un kī razā thī

ek sahra tha bas pani kahin tha na hawa thi

bin tere hayat apni baDi saKHt saza thi

ye sham'-e-mohabbat to kabhi bujhti nahin hai

main soch raha hun ki kahan meri KHata thi

aisa nahin duniya thi hamesha hi se aisi

wo daur bhi tha jis mein mohabbat thi wafa thi

di waqt ne dastak to mere dar pe kai bar

dar jis ne na khola wo meri apni ana thi

aasan na tha yun rah-e-hasti se guzarna

kya jaaniye kis kis ki mere sath du'a thi

hum jis ko samajh baiThe the ai dost taghaful

sunte hain ki us shoKH ki wo KHas ada thi

yunhi nahin allah pe lae hain yaqin log

insan ke hathon mein fana thi na baqa thi

warna to ye mumkin hi nahin tha kabhi 'gulshan'

lagta hai tabahi mein meri un ki raza thi