ek samt duniya mushtail aur ek taraf hai soz-e-dil

ik samt duniyā mushta.il aur ik taraf hai soz-e-dil

sadiyoñ se jaarī hai ye panja-āzmā.ī mustaqil

hone lagā hai rafta rafta titliyoñ kā ḳhuuñ safed

phūloñ ko bas is ranj ne hī kar diyā hai muzmahil

sūraj se bach kar aa gayā ik peḌ ko apnā liyā

aur vo shajar karne lagā mujh meñ harārat muntaqil

dastak na de dastak na de dastak na de dil par mire

ḳhālī makāñ hai nāsehā mat kar nigahbāñ ko ḳhajil

jaarī hai kab se kārobār-e-ishq kyā batlā.ūñ maiñ

bāzār kā to kyā kahūñ aadam bhī the be-āb-o-gil

maalī mayassar hī nahīñ maalī mayassar hī nahīñ

bas dukh yahī lāhaq huā hai is shajar ko jāñ-gusil

thā sur.at-e-raftār dil se aql ko aisā hasad

ik aur dil hī ho gayā hai merī manzil meñ muḳhil

ek samt duniya mushtail aur ek taraf hai soz-e-dil

sadiyon se jari hai ye panja-azmai mustaqil

hone laga hai rafta rafta titliyon ka KHun safed

phulon ko bas is ranj ne hi kar diya hai muzmahil

suraj se bach kar aa gaya ek peD ko apna liya

aur wo shajar karne laga mujh mein hararat muntaqil

dastak na de dastak na de dastak na de dil par mere

KHali makan hai naseha mat kar nigahban ko KHajil

jari hai kab se karobar-e-ishq kya batlaun main

bazar ka to kya kahun aadam bhi the be-ab-o-gil

mali mayassar hi nahin mali mayassar hi nahin

bas dukh yahi lahaq hua hai is shajar ko jaan-gusil

tha surat-e-raftar dil se aql ko aisa hasad

ek aur dil hi ho gaya hai meri manzil mein muKHil