ek sar-basar sarab hun wahm-o-guman hun main

ik sar-basar sarāb huuñ vahm-o-gumāñ huuñ maiñ

har chand huuñ yahāñ pe yahāñ bhī kahāñ huuñ maiñ

dekhūñ to kuchh nahīñ huuñ maiñ kuchh bhī nahīñ huuñ maiñ

sochūñ to apne aap meñ ik haft-ḳhvāñ huuñ maiñ

merā hisāb kyā ho mirā kyā ho ehtisāb

apne hisāb se to sarāsar ziyāñ huuñ maiñ

itnā ulaT-palaT ke bhalā dekhte ho kyā

kah to rahā huuñ tum se faqat rā.egāñ huuñ maiñ

ye kuchh 'ajab nahīñ ki haiñ sab mujh se bad-gumāñ

ḳhud apne aap se bhī kahāñ ḳhush-gumāñ huuñ maiñ

kyoñ log mere daam lagāte jhijakte haiñ

merā nahīñ ḳhayāl ki itnā girāñ huuñ maiñ

ek sar-basar sarab hun wahm-o-guman hun main

har chand hun yahan pe yahan bhi kahan hun main

dekhun to kuchh nahin hun main kuchh bhi nahin hun main

sochun to apne aap mein ek haft-KHwan hun main

mera hisab kya ho mera kya ho ehtisab

apne hisab se to sarasar ziyan hun main

itna ulaT-palaT ke bhala dekhte ho kya

kah to raha hun tum se faqat raegan hun main

ye kuchh 'ajab nahin ki hain sab mujh se bad-guman

KHud apne aap se bhi kahan KHush-guman hun main

kyon log mere dam lagate jhijakte hain

mera nahin KHayal ki itna giran hun main