ek shab-e-tarik hum manzil pe yun lae gae

ik shab-e-tārīk ham manzil pe yuuñ laa.e ga.e

qaid se nikle to ik maqtal meñ pahuñchā.e ga.e

har qadam par ḳhuun bikhrā thā hamārī raah par

ġhāliban kuchh log idhar pahle bhī le jaa.e ga.e

ek tābinda kiran kī aarzū ke jurm meñ

saiñkaḌoñ sūraj mire siine meñ dahkā.e ga.e

mil gayā duniyā ko mere qatl kā ik din surāġh

jis jagah maiñ kho gayā thā tum vahīñ paa.e ga.e

mere haq meñ jis kisī ke bhī du'ā ko haath uThe

us kī chaukhaT tak mirī taqdīr ke saa.e ga.e

haa.e ye din jo nahīñ lete kahīñ jaane kā naam

vaa.e vo din jo paloñ meñ ho ga.e aa.e ga.e

chashm-e-tar meñ aaj tak zinda hai 'tal’at' vo ghaḌī

jab salīboñ par mire jazbāt laTkā.e ga.e

ek shab-e-tarik hum manzil pe yun lae gae

qaid se nikle to ek maqtal mein pahunchae gae

har qadam par KHun bikhra tha hamari rah par

ghaaliban kuchh log idhar pahle bhi le jae gae

ek tabinda kiran ki aarzu ke jurm mein

sainkaDon suraj mere sine mein dahkae gae

mil gaya duniya ko mere qatl ka ek din suragh

jis jagah main kho gaya tha tum wahin pae gae

mere haq mein jis kisi ke bhi du'a ko hath uThe

us ki chaukhaT tak meri taqdir ke sae gae

hae ye din jo nahin lete kahin jaane ka nam

wae wo din jo palon mein ho gae aae gae

chashm-e-tar mein aaj tak zinda hai 'tal’at' wo ghaDi

jab salibon par mere jazbaat laTkae gae