ek taq mein hun jaise rakkha hua akela

ik taaq meñ huuñ jaise rakkhā huā akelā

jaltā huā akelā bujhtā huā akelā

kab tak karegā mujh meñ ābād ik jahāñ ko

shāḳhoñ meñ ik parinda baiThā huā akelā

baḌhtā rahā maiñ aage haTtā rahā maiñ pīchhe

din bhar yūñhī havā se laḌtā huā akelā

āñkhoñ se us kī Tapkā kab tak vahāñ maiñ rahtā

ban jā.ūñgā samundar bahtā huā akelā

varna tabīb saare mushkil meñ paḌ ga.e the

ahbāb se bachā to achchhā huā akelā

ye ishq hai samundar phailā huā jahāñ meñ

mujh sā hai ik musāfir bhaTkā huā akelā

dariyā se mil ke dariyā bantā rahā hai qatra

āñkhoñ se gir ke aañsū taarā huā akelā

khiḌkī se maiñ ne bāhar dekhā hai ik musāfir

dahlīz par vo baiThā bhīgā huā akelā

ek taq mein hun jaise rakkha hua akela

jalta hua akela bujhta hua akela

kab tak karega mujh mein aabaad ek jahan ko

shaKHon mein ek parinda baiTha hua akela

baDhta raha main aage haTta raha main pichhe

din bhar yunhi hawa se laDta hua akela

aankhon se us ki Tapka kab tak wahan main rahta

ban jaunga samundar bahta hua akela

warna tabib sare mushkil mein paD gae the

ahbab se bacha to achchha hua akela

ye ishq hai samundar phaila hua jahan mein

mujh sa hai ek musafir bhaTka hua akela

dariya se mil ke dariya banta raha hai qatra

aankhon se gir ke aansu tara hua akela

khiDki se main ne bahar dekha hai ek musafir

dahliz par wo baiTha bhiga hua akela