ek tamasha zat ka apni bana kar dekh lo

ik tamāsha zaat kā apnī banā kar dekh lo

qissa-e-ġham apne logoñ ko sunā kar dekh lo

vo dhuāñ hogā ki phir be-maut mar jā.eñge log

ye charāġh-e-ishq hai is ko bujhā kar dekh lo

ik na ik din chīḳh ban kar sāmne aa jā.eñgī

ḳhvāhishoñ ko aap bhī apnī dabā kar dekh lo

dard ke naġhmāt duniyā meñ koī suntā nahīñ

tum ko ḳhvāhish hai sunāne kī sunā kar dekh lo

saarī duniyā ke hasīñ manzar nazar meñ ā.eñge

tum kabhī bazm-e-mohabbat meñ to jā kar dekh lo

koshisheñ jitnī karo tum bhuul jaane kī magar

bhūlnā āsān hai kyā aazmā kar dekh lo

naqsh-e-avval huuñ koī harf-e-ġhalat to huuñ nahīñ

tum miTānā chāhte ho to miTā kar dekh lo

dost dushman sab nazar aa jā.eñge 'nusrat' tumheñ

vo jo dil meñ hai use hoñToñ pe lā kar dekh lo

ek tamasha zat ka apni bana kar dekh lo

qissa-e-gham apne logon ko suna kar dekh lo

wo dhuan hoga ki phir be-maut mar jaenge log

ye charagh-e-ishq hai is ko bujha kar dekh lo

ek na ek din chiKH ban kar samne aa jaengi

KHwahishon ko aap bhi apni daba kar dekh lo

dard ke naghmat duniya mein koi sunta nahin

tum ko KHwahish hai sunane ki suna kar dekh lo

sari duniya ke hasin manzar nazar mein aaenge

tum kabhi bazm-e-mohabbat mein to ja kar dekh lo

koshishen jitni karo tum bhul jaane ki magar

bhulna aasan hai kya aazma kar dekh lo

naqsh-e-awwal hun koi harf-e-ghalat to hun nahin

tum miTana chahte ho to miTa kar dekh lo

dost dushman sab nazar aa jaenge 'nusrat' tumhein

wo jo dil mein hai use honTon pe la kar dekh lo