ek tamasha dekhta hun rasm-e-ulfat ke KHilaf

ik tamāshā dekhtā huuñ rasm-e-ulfat ke ḳhilāf

aañkh hai dil kī muḳhālif dil nasīhat ke ḳhilāf

sah rahī haiñ zulm āñkheñ nazm-e-qudrat ke ḳhilāf

but-kade par jhuk rahā hai dil mashiyyat ke ḳhilāf

laakh sar paTkā kare dil zo'f-e-hujjat ke ḳhilāf

chal nahīñ saktī koī tadbīr qismat ke ḳhilāf

nā-tavāñ sī ye sadā aatī hai ab bhī najd meñ

vo bhī kyā din the ki jab dil thā mohabbat ke ḳhilāf

marhabā vo be-niyāzī mudda'ī-e-hosh kī

jo ġhanī kar de tavakkul ban ke daulat ke ḳhilāf

aa.ina ye kah ke āḳhir toḌ Daalā shoḳh ne

shirk kī sūrat nazar aa.ī hai vahdat ke ḳhilāf

āḳhirī manzil pe dam le kar jo dekhā to khulā

raah duniyā meñ nahīñ koī haqīqat ke ḳhilāf

ek vā'de par hī kyā mauqūf hai jān-e-jahāñ

tum hamesha baat karte ho tabī'at ke ḳhilāf

ab mujhe apne muqaddar par haqīqī naaz hai

sāmne hone ko haiñ āḳhir vo 'ādat ke ḳhilāf

chhup ga.e haiñ is liye āñkhoñ meñ āñkheñ Daal kar

faisla mahfūz hai goyā shahādat ke ḳhilāf

dekhtā gar 'shād' aur ābād har maġhmūm ko

kyoñ zabāñ khultī bashar kī dast-e-rahmat ke ḳhilāf

ek tamasha dekhta hun rasm-e-ulfat ke KHilaf

aankh hai dil ki muKHalif dil nasihat ke KHilaf

sah rahi hain zulm aankhen nazm-e-qudrat ke KHilaf

but-kade par jhuk raha hai dil mashiyyat ke KHilaf

lakh sar paTka kare dil zo'f-e-hujjat ke KHilaf

chal nahin sakti koi tadbir qismat ke KHilaf

na-tawan si ye sada aati hai ab bhi najd mein

wo bhi kya din the ki jab dil tha mohabbat ke KHilaf

marhaba wo be-niyazi mudda'i-e-hosh ki

jo ghani kar de tawakkul ban ke daulat ke KHilaf

aaina ye kah ke aaKHir toD Dala shoKH ne

shirk ki surat nazar aai hai wahdat ke KHilaf

aaKHiri manzil pe dam le kar jo dekha to khula

rah duniya mein nahin koi haqiqat ke KHilaf

ek wa'de par hi kya mauquf hai jaan-e-jahan

tum hamesha baat karte ho tabi'at ke KHilaf

ab mujhe apne muqaddar par haqiqi naz hai

samne hone ko hain aaKHir wo 'adat ke KHilaf

chhup gae hain is liye aankhon mein aankhen Dal kar

faisla mahfuz hai goya shahadat ke KHilaf

dekhta gar 'shad' aur aabaad har maghmum ko

kyon zaban khulti bashar ki dast-e-rahmat ke KHilaf