ek tu hi mujhe dil mein samone ke liye tha

ik tū hī mujhe dil meñ samone ke liye thā

ye shahr to saarā mujhe khone ke liye thā

dariyā chalā aaya thā mirī raah meñ chal kar

kashtī kā safar mujh ko Dubone ke liye thā

afsos vahī qaht kā luqma banā āḳhir

vo biij ki jo ḳhaak meñ bone ke liye thā

tohfe meñ diyā ham ko tire shahr-e-vafā ne

vo dāġh-e-nadāmat ki jo dhone ke liye thā

ḳhvāboñ ke tasalsul meñ hī uljhī rahīñ āñkheñ

ik pal na milā aisā jo sone ke liye thā

ik umr tarāshā kiyā jo apne hī but ko

vo apne hī ghar ke kisī kone ke liye thā

kuchh mujh ko rulāne kī tamanna bhī thī us kī

kuchh vaqt mire paas bhī rone ke liye thā

ārām-talab log the 'shahzād' so ham se

vo bhī na huā kaam jo hone ke liye thā

ek tu hi mujhe dil mein samone ke liye tha

ye shahr to sara mujhe khone ke liye tha

dariya chala aaya tha meri rah mein chal kar

kashti ka safar mujh ko Dubone ke liye tha

afsos wahi qaht ka luqma bana aaKHir

wo bij ki jo KHak mein bone ke liye tha

tohfe mein diya hum ko tere shahr-e-wafa ne

wo dagh-e-nadamat ki jo dhone ke liye tha

KHwabon ke tasalsul mein hi uljhi rahin aankhen

ek pal na mila aisa jo sone ke liye tha

ek umr tarasha kiya jo apne hi but ko

wo apne hi ghar ke kisi kone ke liye tha

kuchh mujh ko rulane ki tamanna bhi thi us ki

kuchh waqt mere pas bhi rone ke liye tha

aaram-talab log the 'shahzad' so hum se

wo bhi na hua kaam jo hone ke liye tha