ek zamini hijr ki takrim ko aage baDha

ik zamīnī hijr kī takrīm ko aage baḌhā

vo ufuq-zāda mirī ta.azīm ko aage baḌhā

dekh in kaTte laboñ se ik sitāre kā tulūa

aañkh nam rakh aur lab ta.azīm ko aage baḌhā

maiñ ki aks-e-lā thī lekin vaqt kī lau se pare

ā.ina-gar ḳhud mirī tajsīm ko aage baḌhā

ai udāsī lams-e-ḳhush-tāsīr kī hairat meñ Dhal

ai mohabbat hijr kī taqvīm ko aage baḌhā

mere andar hī se uTThā toḌne vaalā mujhe

ḳhud mirā dil hī mirī taqsīm ko aage baḌhā

thī gurezāñ ġham-gusārī se havā-e-hīla-gar

chāñd hī phir dard kī tanzīm ko aage baḌhā

ek zamini hijr ki takrim ko aage baDha

wo ufuq-zada meri tazim ko aage baDha

dekh in kaTte labon se ek sitare ka tulua

aankh nam rakh aur lab tazim ko aage baDha

main ki aks-e-la thi lekin waqt ki lau se pare

aaina-gar KHud meri tajsim ko aage baDha

ai udasi lams-e-KHush-tasir ki hairat mein Dhal

ai mohabbat hijr ki taqwim ko aage baDha

mere andar hi se uTTha toDne wala mujhe

KHud mera dil hi meri taqsim ko aage baDha

thi gurezan gham-gusari se hawa-e-hila-gar

chand hi phir dard ki tanzim ko aage baDha