ilahi aasman TuTe kabhi shab-ha-e-furqat par

ilāhī āsmāñ TuuTe kabhī shab-hā-e-furqat par

paḌe haiñ jaan ke laale musībat hai musībat par

jafā kī le ke dil ham se jalāyā mil ke dushman se

magar da.avā-e-bātil thā hamārā us kī ulfat par

siyah-baḳhtī kā apnī khul gayā hai nāma-e-a.amāl

añdherā chhā gayā hai dekhnā sub.h-e-qayāmat par

unheñ rote hue dekhā hai aksar hijr-e-dushman meñ

ḳhudā kī shaan hai hañste the jo merī musībat par

mujhe vo dekhte hī niilī piilī āñkheñ karte haiñ

mirī taqdīr kā likkhā nazar aatā hai sūrat par

ye kis nākām-e-ulfat kī hai mātam kī siyah-poshī

ilāhī chhā ga.ī kaisī udāsī shām-e-furqat par

bahāna hai hamārī jaan lene ke liye ye bhī

kisī kā va.ada-e-dīdār aur vo bhī qayāmat par

mirī tarah se āvāra hai ye bhī koh o sahrā meñ

jamāyā rang apnā baḳht-e-bargashta ne qismat par

mujhe ab aañkh bhar kar tum se bhī dekhā na jā.egā

tumhāre husn-e-ālam-tāb kā partav hai sūrat par

kabhī hoñgī pashemāñ bhī tum apne zulm-e-be-jā se

tumheñ bhī rahm aa.egā kabhī bīmār-e-furqat par

bharī mahfil meñ barsā aur vo bhī ġhair ke aage

faqat itnā kahā thā maiñ marā huuñ terī sūrat par

mire sote kabhī aġhyār ke ghar ye na jā.egī

vafādārī mirī sāya-figan hai shām-e-furqat par

zamāne kī do-rangī se umañgeñ miT ga.iiñ saarī

kabhī thā naaz ham ko bhī 'faroġh' apnī tabī.at par

ilahi aasman TuTe kabhi shab-ha-e-furqat par

paDe hain jaan ke lale musibat hai musibat par

jafa ki le ke dil hum se jalaya mil ke dushman se

magar dawa-e-baatil tha hamara us ki ulfat par

siyah-baKHti ka apni khul gaya hai nama-e-amal

andhera chha gaya hai dekhna subh-e-qayamat par

unhen rote hue dekha hai aksar hijr-e-dushman mein

KHuda ki shan hai hanste the jo meri musibat par

mujhe wo dekhte hi nili pili aankhen karte hain

meri taqdir ka likkha nazar aata hai surat par

ye kis nakaam-e-ulfat ki hai matam ki siyah-poshi

ilahi chha gai kaisi udasi sham-e-furqat par

bahana hai hamari jaan lene ke liye ye bhi

kisi ka wada-e-didar aur wo bhi qayamat par

meri tarah se aawara hai ye bhi koh o sahra mein

jamaya rang apna baKHt-e-bargashta ne qismat par

mujhe ab aankh bhar kar tum se bhi dekha na jaega

tumhaare husn-e-alam-tab ka partaw hai surat par

kabhi hongi pasheman bhi tum apne zulm-e-be-ja se

tumhein bhi rahm aaega kabhi bimar-e-furqat par

bhari mahfil mein barsa aur wo bhi ghair ke aage

faqat itna kaha tha main mara hun teri surat par

mere sote kabhi aghyar ke ghar ye na jaegi

wafadari meri saya-figan hai sham-e-furqat par

zamane ki do-rangi se umangen miT gain sari

kabhi tha naz hum ko bhi 'farogh' apni tabiat par