ilahi KHair baDh jae na shorida-sari apni

ilāhī ḳhair baḌh jaa.e na shorīda-sarī apnī

dikhātā hai mirā josh-e-junūñ dīvāngī apnī

ye merī iztirāb-e-shauq kī afzūniyāñ tauba

baḌhī jaatī hai paiham jaane kyoñ āshuftagī apnī

kabhī taḌpā kabhī royā kabhī dil thaam kar uTThā

kisī kal baiThne detī nahīñ hai bekalī apnī

firāq-e-yār meñ do chaar aañsū gar bahā dete

bujhā lete ham in ashkoñ se shāyad tishnagī apnī

bahār-e-husn ke jalve mirī āñkhoñ meñ rahte haiñ

chaman-andoz rahtī hai nigāh-e-āshiqī apnī

kisī ke nargisī sāġhar kā nashsha chhā gayā dil par

ḳhirad ke hosh gum haiñ baḌh ga.ī hai be-ḳhudī apnī

shabāb-e-husn kī shoḳhī junūñ dar-parda laa.ī hai

to āḳhir-kār baḌh jaa.e na kyoñ vāraftagī apnī

na jaane kis kī barq-e-husn ne barbād kar Daalā

ki baḌhtī jā rahī hai dam-ba-dam dīvāngī apnī

mirā charchā zamāne ke adīboñ meñ 'fazā' hogā

kisī din rang lā.egī jahāñ meñ shā.erī apnī

ilahi KHair baDh jae na shorida-sari apni

dikhata hai mera josh-e-junun diwangi apni

ye meri iztirab-e-shauq ki afzuniyan tauba

baDhi jati hai paiham jaane kyon aashuftagi apni

kabhi taDpa kabhi roya kabhi dil tham kar uTTha

kisi kal baiThne deti nahin hai bekali apni

firaq-e-yar mein do chaar aansu gar baha dete

bujha lete hum in ashkon se shayad tishnagi apni

bahaar-e-husn ke jalwe meri aankhon mein rahte hain

chaman-andoz rahti hai nigah-e-ashiqi apni

kisi ke nargisi saghar ka nashsha chha gaya dil par

KHirad ke hosh gum hain baDh gai hai be-KHudi apni

shabab-e-husn ki shoKHi junun dar-parda lai hai

to aaKHir-kar baDh jae na kyon waraftagi apni

na jaane kis ki barq-e-husn ne barbaad kar Dala

ki baDhti ja rahi hai dam-ba-dam diwangi apni

mera charcha zamane ke adibon mein 'faza' hoga

kisi din rang laegi jahan mein shaeri apni