ilham saut pa ke azanon tak aa gaya

ilhām saut pā ke azānoñ tak aa gayā

jitnā bhī dil kā shor thā kānoñ tak aa gayā

us paar jis qadar bhī ġhubār-e-vajūd thā

pahlī nazar meñ ā.ina-ḳhānoñ tak aa gayā

har dastiyāb zaḳhm rahīn-e-hunar kiyā

phir maiñ kitāb ban ke dukānoñ tak aa gayā

maanā ki mere haath pe dastak udhār thī

lekin ye kyā ki ḳhālī makānoñ tak aa gayā

kam-qāmatī kā dukh mujhe laayā salīb tak

utrā salīb se to zamānoñ tak aa gayā

kyā jaane jū-e-ḳhūñ nikal aa.e ki jū-e-shīr

teshe meñ aag thī so chaTānoñ tak aa gayā

nā-dīdanī tavāf kī tā.īd kis se leñ

pīr-e-haram kā ḳhauf javānoñ tak aa gayā

hotī hai bāzgasht bhī kis ehtimām se

chehra bujhā to naam zabānoñ tak aa gayā

ilham saut pa ke azanon tak aa gaya

jitna bhi dil ka shor tha kanon tak aa gaya

us par jis qadar bhi ghubar-e-wajud tha

pahli nazar mein aaina-KHanon tak aa gaya

har dastiyab zaKHm rahin-e-hunar kiya

phir main kitab ban ke dukanon tak aa gaya

mana ki mere hath pe dastak udhaar thi

lekin ye kya ki KHali makanon tak aa gaya

kam-qamati ka dukh mujhe laya salib tak

utra salib se to zamanon tak aa gaya

kya jaane ju-e-KHun nikal aae ki ju-e-shir

teshe mein aag thi so chaTanon tak aa gaya

na-didani tawaf ki taid kis se len

pir-e-haram ka KHauf jawanon tak aa gaya

hoti hai bazgasht bhi kis ehtimam se

chehra bujha to nam zabanon tak aa gaya