ilm kis ko tha ki tarsil-e-hawa ruk jaegi

ilm kis ko thā ki tarsīl-e-havā ruk jā.egī

agle mausam tak mirī nashv-o-numā ruk jā.egī

ho chukegā daf.atan zauq-e-samā.at muḳhtalif

aate aate mere hoñToñ tak sadā ruk jā.egī

tū hī kyuuñ nādim hai itnī mere ghar kī aabrū

kis ke sar par aisī āñdhī meñ ridā ruk jā.egī

ab tamāshā dekhne vāloñ meñ ham-sāya bhī hai

TūTtī chhat mere chillāne se kyā ruk jā.egī

kārvāñ ko gher hī legā sukūt-e-regzār

gūñjne se qabl hī bāñg-e-darā ruk jā.egī

kal na hogā koī is bastī meñ merā muntazir

kal mire talvoñ hī meñ āvāz-e-pā ruk jā.egī

kyā tahaffuz de sakegī mujh ko vaz-e-ehtiyāt

kyā darīche muuñd lene se balā ruk jā.egī

ilm kis ko tha ki tarsil-e-hawa ruk jaegi

agle mausam tak meri nashw-o-numa ruk jaegi

ho chukega dafatan zauq-e-samaat muKHtalif

aate aate mere honTon tak sada ruk jaegi

tu hi kyun nadim hai itni mere ghar ki aabru

kis ke sar par aisi aandhi mein rida ruk jaegi

ab tamasha dekhne walon mein ham-saya bhi hai

TuTti chhat mere chillane se kya ruk jaegi

karwan ko gher hi lega sukut-e-regzar

gunjne se qabl hi bang-e-dara ruk jaegi

kal na hoga koi is basti mein mera muntazir

kal mere talwon hi mein aawaz-e-pa ruk jaegi

kya tahaffuz de sakegi mujh ko waz-e-ehtiyat

kya dariche mund lene se bala ruk jaegi