ilm-o-jah-o-zor-o-zar kuchh bhi na dekha jae hai

ilm-o-jāh-o-zor-o-zar kuchh bhī na dekhā jaa.e hai

bazm-e-sāqī meñ diloñ kā zarf jāñchā jaa.e hai

koshisheñ haiñ dasht khiñch aa.e gulistāñ kī taraf

aur gulistāñ hai ki sū-e-dasht khiñchtā jaa.e hai

chashm-e-tar ik rah ga.ī hai yādgār-e-ahd-e-ishq

gaahe gaahe ye mirī rātoñ ko chamkā jaa.e hai

ho chuke haiñ ḳhushk sab ehsās ke sote magar

qalb-e-shā.ir hai jo thoḌī sī namī pā jaa.e hai

bol mīThe pyaar ke hoñToñ meñ yuuñ phañste haiñ aaj

tifl jaise ghar ke an-jānoñ meñ sharmā jaa.e hai

kuchh na kuchh nanhe se har taare kī lau detī hai aaj

go ba-zāhir us pe shab kī tīrgī chhā jaa.e hai

is taraf amn-o-baqā aur us taraf jañg-o-fanā

dekhiye ye kārvāñ kis samt 'mullā' jaa.e hai

ilm-o-jah-o-zor-o-zar kuchh bhi na dekha jae hai

bazm-e-saqi mein dilon ka zarf jaancha jae hai

koshishen hain dasht khinch aae gulistan ki taraf

aur gulistan hai ki su-e-dasht khinchta jae hai

chashm-e-tar ek rah gai hai yaadgar-e-ahd-e-ishq

gahe gahe ye meri raaton ko chamka jae hai

ho chuke hain KHushk sab ehsas ke sote magar

qalb-e-shair hai jo thoDi si nami pa jae hai

bol miThe pyar ke honTon mein yun phanste hain aaj

tifl jaise ghar ke an-jaanon mein sharma jae hai

kuchh na kuchh nanhe se har tare ki lau deti hai aaj

go ba-zahir us pe shab ki tirgi chha jae hai

is taraf amn-o-baqa aur us taraf jang-o-fana

dekhiye ye karwan kis samt 'mulla' jae hai