iltifat-e-am hai wajh-e-pareshani mujhe

iltifāt-e-ām hai vaj.h-e-pareshānī mujhe

kis qadar mahñgī paḌī hai un kī arzānī mujhe

bahr-e-hastī hai mirī nazroñ meñ ik dasht-e-sarāb

ret kā hotā hai dhoka dekh kar paanī mujhe

tere jalvoñ kā to har ik zarra hai ā.īna-dār

māne-e-nazzāra hai ḳhud merī hairānī mujhe

sa.ī-e-be-hāsil thī dil kī koshish-e-iḳhfā-e-rāz

kar ga.ī rusvā nigāhoñ kī pareshānī mujhe

yā adū-e-bul-havas kī nāz-bardārī karo

yā banā lo taḳhta-e-mashq-e-sitam-rānī mujhe

khul nahīñ saktī faqat ik aap ke dil kī girah

varna kyā kyā gutthiyāñ aatī haiñ suljhānī mujhe

kis qadar nā-paid haiñ ahl-e-kamāl ab ai 'vafā'

koī apnā bhī nazar aatā nahīñ saanī mujhe

iltifat-e-am hai wajh-e-pareshani mujhe

kis qadar mahngi paDi hai un ki arzani mujhe

bahr-e-hasti hai meri nazron mein ek dasht-e-sarab

ret ka hota hai dhoka dekh kar pani mujhe

tere jalwon ka to har ek zarra hai aaina-dar

mane-e-nazzara hai KHud meri hairani mujhe

sai-e-be-hasil thi dil ki koshish-e-iKHfa-e-raaz

kar gai ruswa nigahon ki pareshani mujhe

ya adu-e-bul-hawas ki naz-bardari karo

ya bana lo taKHta-e-mashq-e-sitam-rani mujhe

khul nahin sakti faqat ek aap ke dil ki girah

warna kya kya gutthiyan aati hain suljhani mujhe

kis qadar na-paid hain ahl-e-kamal ab ai 'wafa'

koi apna bhi nazar aata nahin sani mujhe