ilzam kuchh na kuchh to mere sar bhi aaega

ilzām kuchh na kuchh to mire sar bhī aa.egā

āñgan meñ peḌ hogā to patthar bhī aa.egā

sūraj ke ġhusl karne kā manzar bhī aa.egā

in jañgaloñ ke ba.ad samundar bhī aa.egā

sāmāñ jarāhatoñ ke bhī ham saath le chaleñ

is rāste meñ shahr-e-sitamgar bhī aa.egā

vo saañp jis ko duudh pilātī hai dushmanī

thailī se ek roz vo bāhar bhī aa.egā

palkoñ pe apnī ḳhvāb-e-tajallī sajā.iye

shaam aa.ī hai to raat kā lashkar bhī aa.egā

jo saaya kheltā hai abhī merī god meñ

ik din vo mere qad ke barābar bhī aa.egā

is dopahar kī dhuup ko shāyad ḳhabar nahīñ

sahrā meñ koī mom kā paikar bhī aa.egā

jab tum nahīñ to us kā bhī kyā kaam hai yahāñ

tum aaoge to bazm meñ 'qaisar' bhī aa.egā

ilzam kuchh na kuchh to mere sar bhi aaega

aangan mein peD hoga to patthar bhi aaega

suraj ke ghusl karne ka manzar bhi aaega

in jangalon ke baad samundar bhi aaega

saman jarahaton ke bhi hum sath le chalen

is raste mein shahr-e-sitamgar bhi aaega

wo sanp jis ko dudh pilati hai dushmani

thaili se ek roz wo bahar bhi aaega

palkon pe apni KHwab-e-tajalli sajaiye

sham aai hai to raat ka lashkar bhi aaega

jo saya khelta hai abhi meri god mein

ek din wo mere qad ke barabar bhi aaega

is dopahar ki dhup ko shayad KHabar nahin

sahra mein koi mom ka paikar bhi aaega

jab tum nahin to us ka bhi kya kaam hai yahan

tum aaoge to bazm mein 'qaisar' bhi aaega