imkan se pare kar-e-hunar karta chala jaun

imkāñ se pare kār-e-hunar kartā chalā jā.ūñ

jo sang mile us ko guhar kartā chalā jā.ūñ

be-samt-o-nishāñ azm-e-safar bāñdh ke uTThūñ

tasḳhīr na.ī rāhguzar kartā chalā jā.ūñ

har gaam pe ta.amīr karūñ ek makāñ maiñ

phir saare makānoñ ko khañDar kartā chalā jā.ūñ

aa jā.ūñ agar maskan-e-auhām se bāhar

har mamlikat-e-ḳhvāb ko sar kartā chalā jā.ūñ

kar duuñ shab-e-tārīk ko sho.aloñ ke havāle

shāmoñ ko ham-āġhosh-e-sahar kartā chalā jā.ūñ

abvāb-e-ufuq mujh pe agar khulte chale jaa.eñ

ik saañs na luuñ yūñhī safar kartā chalā jā.ūñ

ḳhāroñ kī ziyāfat kā to sāmān kiyā hai

sahrā ke lab-e-ḳhushk bhī tar kartā chalā jā.ūñ

imkan se pare kar-e-hunar karta chala jaun

jo sang mile us ko guhar karta chala jaun

be-samt-o-nishan azm-e-safar bandh ke uTThun

tasKHir nai rahguzar karta chala jaun

har gam pe tamir karun ek makan main

phir sare makanon ko khanDar karta chala jaun

aa jaun agar maskan-e-auham se bahar

har mamlikat-e-KHwab ko sar karta chala jaun

kar dun shab-e-tarik ko shoalon ke hawale

shamon ko ham-aghosh-e-sahar karta chala jaun

abwab-e-ufuq mujh pe agar khulte chale jaen

ek sans na lun yunhi safar karta chala jaun

KHaron ki ziyafat ka to saman kiya hai

sahra ke lab-e-KHushk bhi tar karta chala jaun