imroz ki kashti ko Dubone ke liye hun

imroz kī kashtī ko Dubone ke liye huuñ

kal aur kisī rañg meñ hone ke liye huuñ

tū bhī hai faqat apnī shahādat kā talabgār

maiñ bhī to isī dard meñ rone ke liye huuñ

jiine kā taqāzā mujhe marne nahīñ detā

mar kar bhī samajhtā huuñ ki hone ke liye huuñ

hāthoñ meñ mire chāñd bhī lagtā hai khilaunā

ḳhvāboñ meñ falak rañg samone ke liye huuñ

har baar ye shīshe kā badan TuuT gayā hai

har baar na.e ek khilaune ke liye huuñ

pardes kī rātoñ meñ bahut jaag chukā maiñ

ab ghar kā sukūñ oḌh ke sone ke liye huuñ

siine meñ koī zaḳhm ki khulne ke liye hai

āñkhoñ meñ koī ashk ki rone ke liye huuñ

saada sī koī baat nahīñ bhuuk shikam kī

īmān bhī roTī meñ samone ke liye huuñ

vo dasht-o-bayābān meñ iz.hār kā ḳhvāhāñ

maiñ apne chaman-zār meñ rone ke liye huuñ

ġhāroñ kā safar hai ki mukammal nahīñ hotā

maiñ apnī ḳhabar aap hī Dhone ke liye huuñ

sūraj ko nikalne meñ zarā der hai 'ahmad'

phir zaat kā har rañg maiñ khone ke liye huuñ

imroz ki kashti ko Dubone ke liye hun

kal aur kisi rang mein hone ke liye hun

tu bhi hai faqat apni shahadat ka talabgar

main bhi to isi dard mein rone ke liye hun

jine ka taqaza mujhe marne nahin deta

mar kar bhi samajhta hun ki hone ke liye hun

hathon mein mere chand bhi lagta hai khilauna

KHwabon mein falak rang samone ke liye hun

har bar ye shishe ka badan TuT gaya hai

har bar nae ek khilaune ke liye hun

pardes ki raaton mein bahut jag chuka main

ab ghar ka sukun oDh ke sone ke liye hun

sine mein koi zaKHm ki khulne ke liye hai

aankhon mein koi ashk ki rone ke liye hun

sada si koi baat nahin bhuk shikam ki

iman bhi roTi mein samone ke liye hun

wo dasht-o-bayaban mein izhaar ka KHwahan

main apne chaman-zar mein rone ke liye hun

ghaaron ka safar hai ki mukammal nahin hota

main apni KHabar aap hi Dhone ke liye hun

suraj ko nikalne mein zara der hai 'ahmad'

phir zat ka har rang main khone ke liye hun