imtihan apne jafa-kash ka use manzur tha

imtihāñ apne jafā-kash kā use manzūr thā

varna maiñ nazdīk thā furqat meñ kyā kuchh duur thā

pūchhe hai āshiq kī apnī dekh kar turbat ko kyā

kushtgān-e-ishq se ye bhī koī maġhfūr thā

mudda.ā thā ham se bhaḌkānā use bāteñ sunā

ḳhair-ḳhvāhī kā hamārī us meñ kyā mazkūr thā

marte-marte abr ko hargiz na muñh chaḌhne diyā

āfrīñ ai chashm-e-tar terā hī ye maqdūr thā

mai-parastoñ ne tire yuuñ bhī na jaanā kaun hai

shaiḳh go shaitān se zyāda yahāñ mash.hūr thā

tīra-baḳhtān-e-asīr-e-zulf kī apne na pūchh

roz-o-shab yaañ ek hai din bhī shab-e-dījūr thā

be-qarārī dil kī le aa.ī galī meñ terī yaar

us ko hāthoñ kyā karūñ nā-chār thā majbūr thā

vasl meñ bhī haa.e apne jī kī jī meñ hī rahī

kuchh na kahne paa.e 'fidvī' vo nashe meñ chuur thā

imtihan apne jafa-kash ka use manzur tha

warna main nazdik tha furqat mein kya kuchh dur tha

puchhe hai aashiq ki apni dekh kar turbat ko kya

kushtgan-e-ishq se ye bhi koi maghfur tha

muddaa tha hum se bhaDkana use baaten suna

KHair-KHwahi ka hamari us mein kya mazkur tha

marte-marte abr ko hargiz na munh chaDhne diya

aafrin ai chashm-e-tar tera hi ye maqdur tha

mai-paraston ne tere yun bhi na jaana kaun hai

shaiKH go shaitan se zyaada yahan mashhur tha

tira-baKHtan-e-asir-e-zulf ki apne na puchh

roz-o-shab yan ek hai din bhi shab-e-dijur tha

be-qarari dil ki le aai gali mein teri yar

us ko hathon kya karun na-chaar tha majbur tha

wasl mein bhi hae apne ji ki ji mein hi rahi

kuchh na kahne pae 'fidwi' wo nashe mein chur tha