in dinon haq jo baat kahte hain

in dinoñ haq jo baat kahte haiñ

jaan se dho ke haat kahte haiñ

husn ko nūr-e-zāt kahte haiñ

ishq kī kā.enāt kahte haiñ

dil ko jo be-sabāt kahte haiñ

din ko goyā vo raat kahte haiñ

jis kī me.arāj ḳhud-shanāsī ho

ham use vasl-e-zāt kahte haiñ

un kī himmat pe āfrīñ kahiye

jo ajal ko hayāt kahte haiñ

jaan kā jism se judā honā

kyā isī ko najāt kahte haiñ

ka.aba-e-dil hai jalva-gāh-e-butāñ

ham ise somnāt kahte haiñ

hue jaate haiñ aap kyuuñ barham

ham zamāne kī baat kahte haiñ

nigah-e-qahr ko bhī dil vaale

nigah-e-iltifāt kahte haiñ

tum par apnā gumān hotā hai

tum se jab dil kī baat kahte haiñ

bāda-e-ḳhush-gavār hai saaqī

jise āb-e-hayāt kahte haiñ

kyā hameñ guftugū se matlab thā

baat aane pe baat kahte haiñ

jauhar-e-rūh kā pasīna hai

jise itr-e-hayāt kahte haiñ

mas nahīñ kuchh jinheñ taġhazzul se

falsafe ke nikāt kahte haiñ

multafit apnī samt karnā hai

tumheñ be-iltifāt kahte haiñ

aib jin ke hunar se hoñ 'tālib'

unheñ aalī sifāt kahte haiñ

in dinon haq jo baat kahte hain

jaan se dho ke hat kahte hain

husn ko nur-e-zat kahte hain

ishq ki kaenat kahte hain

dil ko jo be-sabaat kahte hain

din ko goya wo raat kahte hain

jis ki mearaj KHud-shanasi ho

hum use wasl-e-zat kahte hain

un ki himmat pe aafrin kahiye

jo ajal ko hayat kahte hain

jaan ka jism se juda hona

kya isi ko najat kahte hain

kaba-e-dil hai jalwa-gah-e-butan

hum ise somnat kahte hain

hue jate hain aap kyun barham

hum zamane ki baat kahte hain

nigah-e-qahr ko bhi dil wale

nigah-e-iltifat kahte hain

tum par apna guman hota hai

tum se jab dil ki baat kahte hain

baada-e-KHush-gawar hai saqi

jise aab-e-hayat kahte hain

kya hamein guftugu se matlab tha

baat aane pe baat kahte hain

jauhar-e-ruh ka pasina hai

jise itr-e-hayat kahte hain

mas nahin kuchh jinhen taghazzul se

falsafe ke nikat kahte hain

multafit apni samt karna hai

tumhein be-iltifat kahte hain

aib jin ke hunar se hon 'talib'

unhen aali sifat kahte hain