in dinon har shahr ka naqsha bayabani to hai

in dinoñ har shahr kā naqsha bayābānī to hai

haiñ dar-o-dīvār lekin phir bhī vīrānī to hai

hai qabā-e-gul bahar-sūrat bahāroñ kī naqīb

laakh zanjīreñ na hoñ par chāk-dāmānī to hai

ye alag hai dostoñ ke naam le sakte nahīñ

ham ne apne qātiloñ kī shakl pahchānī to hai

har havas-pesha ne apnāyā hai sheva ishq kā

husn kī bāzār meñ har samt arzānī to hai

qatl kar ke bhī yahāñ nādim nahīñ hote haiñ log

us ne dil toḌā magar us ko pashemānī to hai

ishq meñ ham ne matā.a-e-zindagānī phūñk dī

aql vāloñ kī nazar meñ ye bhī nādānī to hai

sab se chhup saktā hai lekin ḳhud se chhup saktā nahīñ

yaanī tere har amal par ik nigahbānī to hai

sab gunāhoñ kā ta'alluq jism kī miTTī se hai

aur ibrat-gāh-e-hastī meñ badan faanī to hai

husn-e-fitrat ke liye bhī shart hai sharm-o-hijāb

gul ke hoñToñ par hañsī aur aañkh meñ paanī to hai

sach to ye hai qā.id-e-millat kī har taqrīr meñ

maslahat ke naam par kuchh kuchh sanā-ḳhvānī to hai

sirf yak-tarfa nahīñ apne junūñ kī dāstāñ

maiñ huā dīvāna lekin vo bhī dīvānī to hai

kuchh na kuchh to jhāñktā hai pairahan kī oT se

satr-poshī meñ bhī shāmil thoḌī uryānī to hai

haq-parastoñ ke liye dushvār hai duniyā magar

ik sutūn-e-dār tak jaane meñ āsānī to hai

saare rishte munqata.a vo kar chukā ham se 'nasīm'

ik ta'alluq phir bhī us se apnā insānī to hai

in dinon har shahr ka naqsha bayabani to hai

hain dar-o-diwar lekin phir bhi virani to hai

hai qaba-e-gul bahar-surat bahaaron ki naqib

lakh zanjiren na hon par chaak-damani to hai

ye alag hai doston ke nam le sakte nahin

hum ne apne qatilon ki shakl pahchani to hai

har hawas-pesha ne apnaya hai shewa ishq ka

husn ki bazar mein har samt arzani to hai

qatl kar ke bhi yahan nadim nahin hote hain log

us ne dil toDa magar us ko pashemani to hai

ishq mein hum ne mataa-e-zindagani phunk di

aql walon ki nazar mein ye bhi nadani to hai

sab se chhup sakta hai lekin KHud se chhup sakta nahin

yani tere har amal par ek nigahbani to hai

sab gunahon ka ta'alluq jism ki miTTi se hai

aur ibrat-gah-e-hasti mein badan fani to hai

husn-e-fitrat ke liye bhi shart hai sharm-o-hijab

gul ke honTon par hansi aur aankh mein pani to hai

sach to ye hai qaid-e-millat ki har taqrir mein

maslahat ke nam par kuchh kuchh sana-KHwani to hai

sirf yak-tarfa nahin apne junun ki dastan

main hua diwana lekin wo bhi diwani to hai

kuchh na kuchh to jhankta hai pairahan ki oT se

satr-poshi mein bhi shamil thoDi uryani to hai

haq-paraston ke liye dushwar hai duniya magar

ek sutun-e-dar tak jaane mein aasani to hai

sare rishte munqata wo kar chuka hum se 'nasim'

ek ta'alluq phir bhi us se apna insani to hai