in ghaTaon mein ujale ka basera hi sahi

in ghaTāoñ meñ ujāle kā baserā hī sahī

ḳhair agar aap ba-zid haiñ to saverā hī sahī

ai ġham-e-zīst bulātī haiñ mahaktī zulfeñ

aaj kī raat ye pur-nūr añdherā hī sahī

dil meñ jo aag lagī hai vo kahāñ bujhtī hai

raah shādāb sahī abr ghanerā hī sahī

hoshiyār ahl-e-ḳhirad ḳhāk-nashīñ aa pahuñche

aap ke zo.am kā aflāk pe Derā hī sahī

tū pareshān na ho ḳhāliq-e-firdaus-e-barīñ

ye jahannam ye jahāñ aaj se merā hī sahī

kitnī yādeñ haiñ ki nāgin kī tarah Dastī haiñ

'nūr' un galiyoñ kā ik āḳhirī pherā hī sahī

in ghaTaon mein ujale ka basera hi sahi

KHair agar aap ba-zid hain to sawera hi sahi

ai gham-e-zist bulati hain mahakti zulfen

aaj ki raat ye pur-nur andhera hi sahi

dil mein jo aag lagi hai wo kahan bujhti hai

rah shadab sahi abr ghanera hi sahi

hoshiyar ahl-e-KHirad KHak-nashin aa pahunche

aap ke zoam ka aflak pe Dera hi sahi

tu pareshan na ho KHaliq-e-firdaus-e-barin

ye jahannam ye jahan aaj se mera hi sahi

kitni yaaden hain ki nagin ki tarah Dasti hain

'nur' un galiyon ka ek aaKHiri phera hi sahi