in jhilmilate chand sitaron ki chhanw mein

in jhilmilāte chāñd sitāroñ kī chhāñv meñ

dhīme suroñ meñ gaa.e jo bābul to ham suneñ

āñgan meñ tere phuul rahī hogī kāmanī!

jī chāhtā hai aaj baserā vahīñ kareñ

ye chāñd aaj ugā hai baḌī aarzū ke ba.ad

aao mai-e-nashāt piyeñ ġham ġhalat kareñ

apnī suhāg-rāt kabhī bhūltīñ nahīñ

mere hasīñ dayār kī sharmīlī aurteñ

rañg-e-hinā se surḳh rahīñ un kī uñgliyāñ

ai kaash saarī umr vo dūlhan banī raheñ

pyāre haiñ aaj ham bhī bahut der se niDhāl

tum bhī thake hue ho chalo aao so raheñ

jaane hai kaun mahv-e-safar aadhī raat ko

jaane ye kis kī duur se aatī haiñ āhaTeñ

ham ko bulā liyā karo bāteñ kiyā karo

dil meñ tumhāre dard ke tūfān jab uTheñ

uftādgān-e-rāh ke dil par lagegī choT

manzil pe jā ke qāfile āvāz yuuñ na deñ

tum ne tamām baaġh ko vīrān kar diyā

īñdhan ke tājiro ye papīhe kahāñ raheñ

har marhala pe 'daurāñ' hameñ un kī ho talāsh

har manzil-e-hayāt pe un kā hī naam leñ

in jhilmilate chand sitaron ki chhanw mein

dhime suron mein gae jo babul to hum sunen

aangan mein tere phul rahi hogi kaamani!

ji chahta hai aaj basera wahin karen

ye chand aaj uga hai baDi aarzu ke baad

aao mai-e-nashat piyen gham ghalat karen

apni suhag-raat kabhi bhultin nahin

mere hasin dayar ki sharmili aurten

rang-e-hina se surKH rahin un ki ungliyan

ai kash sari umr wo dulhan bani rahen

pyare hain aaj hum bhi bahut der se niDhaal

tum bhi thake hue ho chalo aao so rahen

jaane hai kaun mahw-e-safar aadhi raat ko

jaane ye kis ki dur se aati hain aahaTen

hum ko bula liya karo baaten kiya karo

dil mein tumhaare dard ke tufan jab uThen

uftadgan-e-rah ke dil par lagegi choT

manzil pe ja ke qafile aawaz yun na den

tum ne tamam bagh ko viran kar diya

indhan ke tajiro ye papihe kahan rahen

har marhala pe 'dauran' hamein un ki ho talash

har manzil-e-hayat pe un ka hi nam len