inhin barbaadiyon ko karobar-e-zindagi kah lo

inhīñ barbādiyoñ ko kārobār-e-zindagī kah lo

mirī dīvāngī kyā hai zamāne kī ḳhushī kah lo

ġham-e-jānāñ ġham-e-duniyā na fikr-e-kaif-o-mastī hai

maiñ jis hālat meñ zinda huuñ tum us ko ḳhud-kushī kah lo

gunāhoñ ko tumhāre koī naam apnā nahīñ degā

mujhe ab apne afsāne kā harf-e-āḳhirī kah lo

dhaḌakte rahte haiñ ik dūsre ke dil meñ ham donoñ

hamārī itnī qurbat ko ba-faiz-e-dushmanī kah lo

milā huuñ ittifāqan hī chalā bhī jā.ūñgā 'rizvān'

kuredo mat ga.e vaqtoñ ko mujh ko ajnabī kah lo

inhin barbaadiyon ko karobar-e-zindagi kah lo

meri diwangi kya hai zamane ki KHushi kah lo

gham-e-jaanan gham-e-duniya na fikr-e-kaif-o-masti hai

main jis haalat mein zinda hun tum us ko KHud-kushi kah lo

gunahon ko tumhaare koi nam apna nahin dega

mujhe ab apne afsane ka harf-e-aKHiri kah lo

dhaDakte rahte hain ek dusre ke dil mein hum donon

hamari itni qurbat ko ba-faiz-e-dushmani kah lo

mila hun ittifaqan hi chala bhi jaunga 'rizwan'

kuredo mat gae waqton ko mujh ko ajnabi kah lo