inkar ke pahlu mein hai inkar kam-o-besh

inkār ke pahlū meñ hai inkār kam-o-besh

dīvār ke aage bhī hai dīvār kam-o-besh

dushman se rahā barsar-e-paikār maiñ tanhā

sab apnī bachāte rahe dastār kam-o-besh

ye mulk hunar vāloñ ke haq meñ nahīñ sāhib

ġhurbat meñ yahāñ marte haiñ fankār kam-o-besh

mahke hue ajsām meñ rahtā huuñ hamesha

rahtī hai mire chār-sū mahkār kam-o-besh

ye shahr kisī ḳhauf meñ rahtā hai musalsal

is shahr ke khulte nahīñ bāzār kam-o-besh

maiñ dekhne meñ dost parindoñ kī tarah huuñ

ab mujh se gale milte haiñ ashjār kam-o-besh

ab sub.h se 'mannān' nahīñ milnā milānā

ab der se hotā huuñ maiñ bedār kam-o-besh

inkar ke pahlu mein hai inkar kam-o-besh

diwar ke aage bhi hai diwar kam-o-besh

dushman se raha barsar-e-paikar main tanha

sab apni bachate rahe dastar kam-o-besh

ye mulk hunar walon ke haq mein nahin sahib

ghurbat mein yahan marte hain fankar kam-o-besh

mahke hue ajsam mein rahta hun hamesha

rahti hai mere chaar-su mahkar kam-o-besh

ye shahr kisi KHauf mein rahta hai musalsal

is shahr ke khulte nahin bazar kam-o-besh

main dekhne mein dost parindon ki tarah hun

ab mujh se gale milte hain ashjar kam-o-besh

ab subh se 'mannan' nahin milna milana

ab der se hota hun main bedar kam-o-besh