inqilab-e-sahar-o-sham ki kuchh baat karo

inqilāb-e-sahar-o-shām kī kuchh baat karo

dosto gardish-e-ayyām kī kuchh baat karo

jām-o-mīnā to kahīñ aur se le ā.eñge

mai-kasho sāqī-e-gulfām kī kuchh baat karo

ġhair kī sub.h-e-daraḳhshāñ kā tasavvur kab tak

apnī kajlā.ī huī shaam kī kuchh baat karo

phir jalānā mah-o-ḳhurshīd kī mahfil meñ charāġh

pahle apne hī dar-o-bām kī kuchh baat karo

kyā ye TuuTe hue paimāne liye baiThe ho

bāda-nosho sitam-e-ām kī kuchh baat karo

zikr-e-firdaus-o-iram kal pe uThā rakhte haiñ

aaj to āriz-e-asnām kī kuchh baat karo

maiñ to ḳhair apnī vafāoñ pe huuñ nāzāñ lekin

vo jo tum par hai us ilzām kī kuchh baat karo

talḳhī-e-kām-o-dahan se kahīñ ġham dhulte haiñ

zālimo talḳhī-e-ayyām kī kuchh baat karo

itnā sannāTā ki ehsās kā dam ghuTtā hai

sub.h kā zikr karo shaam kī kuchh baat karo

vahī 'arshad' ki jalātā hai jo āñdhī meñ charāġh

haañ usī shā.ir-e-badnām kī kuchh baat karo

inqilab-e-sahar-o-sham ki kuchh baat karo

dosto gardish-e-ayyam ki kuchh baat karo

jam-o-mina to kahin aur se le aaenge

mai-kasho saqi-e-gulfam ki kuchh baat karo

ghair ki subh-e-daraKHshan ka tasawwur kab tak

apni kajlai hui sham ki kuchh baat karo

phir jalana mah-o-KHurshid ki mahfil mein charagh

pahle apne hi dar-o-baam ki kuchh baat karo

kya ye TuTe hue paimane liye baiThe ho

baada-nosho sitam-e-am ki kuchh baat karo

zikr-e-firdaus-o-iram kal pe uTha rakhte hain

aaj to aariz-e-asnam ki kuchh baat karo

main to KHair apni wafaon pe hun nazan lekin

wo jo tum par hai us ilzam ki kuchh baat karo

talKHi-e-kaam-o-dahan se kahin gham dhulte hain

zalimo talKHi-e-ayyam ki kuchh baat karo

itna sannaTa ki ehsas ka dam ghuTta hai

subh ka zikr karo sham ki kuchh baat karo

wahi 'arshad' ki jalata hai jo aandhi mein charagh

han usi shair-e-badnam ki kuchh baat karo