insaf ki gardan par KHanjar KHud chalte dekha kya kahiye

insāf kī gardan par ḳhanjar ḳhud chalte dekhā kyā kahiye

ahbāb-parastī ke chakkar meñ paḌ ga.ī duniyā kyā kahiye

phir zikr-e-sadāqat chheḌ ke apnī jaan kā dushman kaun bane

duniyā kī nigāhoñ ne dekhā duniyā kā tamāshā kyā kahiye

vo dekh havas ke dosh pe shāyad 'ishq kī mayyat jaatī hai

ab is duniyā meñ kyā hogā ahl-e-vafā kā kyā kahiye

jo aaj sunahrī pardoñ meñ chehroñ ko chhupā.e baiThe haiñ

taqdīr ke māroñ se un kā kal vā'da kyā thā kyā kahiye

jis bastī meñ insānoñ kā dil ġham ke hāthoñ chhalnī ho

us bastī meñ basne vāloñ ke dil kī tamanna kyā kahiye

kuchh log yahāñ haiñ aise bhī kal sab kuchh the ab kuchh bhī nahīñ

baaqī hai faqat tanhā.ī meñ ashkoñ kā sahārā kyā kahiye

ġhairoñ ke sitam se bach nikle apnoñ ke karam se bach na sake

aise meñ agar majbūr kare ġhairat kā taqāzā kyā kahiye

kahte haiñ guzashta daur ko phir tārīḳh jahāñ dohrātī hai

kis dhun meñ gaatā phirtā hai taqdīr kā dhārā kyā kahiye

duniyā meñ jī se jā.egā kaun amn-e-‘ālam kī ḳhātir

ye vaqt batā.egā baiThe kis karvaT duniyā kyā kahiye

har ek mujāhid se lākhoñ ummīdeñ haiñ mazlūmoñ ko

is TuuTī naav kā kaun bane kis vaqt sahārā kyā kahiye

insaf ki gardan par KHanjar KHud chalte dekha kya kahiye

ahbab-parasti ke chakkar mein paD gai duniya kya kahiye

phir zikr-e-sadaqat chheD ke apni jaan ka dushman kaun bane

duniya ki nigahon ne dekha duniya ka tamasha kya kahiye

wo dekh hawas ke dosh pe shayad 'ishq ki mayyat jati hai

ab is duniya mein kya hoga ahl-e-wafa ka kya kahiye

jo aaj sunahri pardon mein chehron ko chhupae baiThe hain

taqdir ke maron se un ka kal wa'da kya tha kya kahiye

jis basti mein insanon ka dil gham ke hathon chhalni ho

us basti mein basne walon ke dil ki tamanna kya kahiye

kuchh log yahan hain aise bhi kal sab kuchh the ab kuchh bhi nahin

baqi hai faqat tanhai mein ashkon ka sahaara kya kahiye

ghairon ke sitam se bach nikle apnon ke karam se bach na sake

aise mein agar majbur kare ghairat ka taqaza kya kahiye

kahte hain guzashta daur ko phir tariKH jahan dohraati hai

kis dhun mein gata phirta hai taqdir ka dhaara kya kahiye

duniya mein ji se jaega kaun amn-e-‘alam ki KHatir

ye waqt bataega baiThe kis karwaT duniya kya kahiye

har ek mujahid se lakhon ummiden hain mazlumon ko

is TuTi naw ka kaun bane kis waqt sahaara kya kahiye