insan ko apni zat ka idrak hi nahin

insāñ ko apnī zaat kā idrāk hī nahīñ

ab koī vārdāt alamnāk hī nahīñ

mazlūm ke lahū kā na ho jis pe koī daaġh

aisī sipāh-e-vaqt kī poshāk hī nahīñ

is daur meñ hifāzat-e-īmāñ ke vāste

haidar kī misl teġh-e-ġhazabnāk hī nahīñ

ā'māl haiñ siyāh hamāre magar hameñ

shikva hai mehrbānī-e-aflāk hī nahīñ

rahmat ḳhudā kī josh meñ aa.e to kaise aa.e

sailāb-e-ashk-dīda-e-nam-nāk hī nahīñ

pahle buland kartā thā 'anvar' sadā-e-haq

lekin ab is meñ jur.at-e-be-bāk hī nahīñ

insan ko apni zat ka idrak hi nahin

ab koi wardat alamnak hi nahin

mazlum ke lahu ka na ho jis pe koi dagh

aisi sipah-e-waqt ki poshak hi nahin

is daur mein hifazat-e-iman ke waste

haidar ki misl tegh-e-ghazabnak hi nahin

aa'mal hain siyah hamare magar hamein

shikwa hai mehrbani-e-aflak hi nahin

rahmat KHuda ki josh mein aae to kaise aae

sailab-e-ashk-dida-e-nam-nak hi nahin

pahle buland karta tha 'anwar' sada-e-haq

lekin ab is mein jurat-e-be-bak hi nahin