insan tere pas to ilm-ul-hayat hai

insān tere paas to 'ilm-ul-hayāt hai

phir kyoñ fareb-o-makr hasad jāt-pāt hai

mashriq kī kāmyābiyāñ bhūle nahīñ haiñ ham

ye aur baat hai ki ye maazī kī baat hai

duniyā meñ aisā kaun hai jo roktā mujhe

mujh ko jo roktī hai vo merī hī zaat hai

hāthoñ meñ dūsroñ ke rahī apnī zindagī

ham kis tarah kaheñ ye hamārī hayāt hai

muusā se marx tak ye bashar ek sā rahā

kutte kī dum ke jaisī ye aadam kī zaat hai

gahrā.ī meñ jo utrā kabhī jaan jā.egā

'rāhib' tirī hayāt hī tirī najāt hai

insan tere pas to 'ilm-ul-hayat hai

phir kyon fareb-o-makr hasad jat-pat hai

mashriq ki kaamyabiyan bhule nahin hain hum

ye aur baat hai ki ye mazi ki baat hai

duniya mein aisa kaun hai jo rokta mujhe

mujh ko jo rokti hai wo meri hi zat hai

hathon mein dusron ke rahi apni zindagi

hum kis tarah kahen ye hamari hayat hai

musa se marx tak ye bashar ek sa raha

kutte ki dum ke jaisi ye aadam ki zat hai

gahrai mein jo utra kabhi jaan jaega

'rahib' teri hayat hi teri najat hai