irada puKHta safar ka jo kar liya ab ke

irāda puḳhta safar kā jo kar liyā ab ke

na koī ḳhatra kisī se na Dar lagā ab ke

darīcha hī nahīñ rauzan na dar khulā ab ke

nazar bachā ke vo phir se guzar gayā ab ke

guzar ke tauba se aayā to ḳhalq bol uThī

qubūl hotī huī dekh har du'ā ab ke

yahī nahīñ ki vahī ran meñ kāmyāb rahā

har ek mā'raka maiñ ne bhī sar kiyā ab ke

tamām raat havāoñ ko kuchh ḳhabar na huī

tamām raat diyā baam par jalā ab ke

koī to hai jise ummīd kī kiran maiñ kahūñ

koī to hai jo sar-e-rahguzar milā ab ke

irada puKHta safar ka jo kar liya ab ke

na koi KHatra kisi se na Dar laga ab ke

daricha hi nahin rauzan na dar khula ab ke

nazar bacha ke wo phir se guzar gaya ab ke

guzar ke tauba se aaya to KHalq bol uThi

qubul hoti hui dekh har du'a ab ke

yahi nahin ki wahi ran mein kaamyab raha

har ek ma'raka main ne bhi sar kiya ab ke

tamam raat hawaon ko kuchh KHabar na hui

tamam raat diya baam par jala ab ke

koi to hai jise ummid ki kiran main kahun

koi to hai jo sar-e-rahguzar mila ab ke