irtibaat-e-bahami shaiKH-o-barahman mein nahin

irtibāt-e-bāhamī shaiḳh-o-barahman meñ nahīñ

jo maza hai mil ke rahne meñ vo an-ban meñ nahīñ

nāla-sanjī-e-anādil se ye chaltā hai pata

naam ko bū-e-vafā arbāb-e-gulshan meñ nahīñ

dair-o-ka.aba kī parastish phir bhalā kis kaam kī

jab ḳhulūs-e-bandagī shaiḳh-o-barahman meñ nahīñ

phir khaTakte haiñ nigāh-e-bāġhbāñ meñ kis liye

ḳhair se ab chaar tinke bhī nasheman meñ nahīñ

umr bhar mujh ko jalā ke sham-o-gul kyuuñ laa.e ab

dāġh-e-dil kī raushnī kyā mere madfan meñ nahīñ

phir taḌap kar baar baar aatī hai bijlī kis liye

ek tinkā bhī to ab mere nasheman meñ nahīñ

apne dil kī aap ne pahnā.iyāñ dekhīñ kahāñ

aisī vus.at to qayāmat ke bhī dāman meñ nahīñ

haath siine par na rakkho ho chukā qissa tamām

ab koī āvāz mere dil kī dhaḌkan meñ nahīñ

haiñ sabaq-āmoz aurāq-e-kitāb-e-gul magar

juz fareb-e-rañg-o-bū kuchh un ke dāman meñ nahīñ

dekh kar vo zaḳhm-e-dil kī kartī kyā baḳhiya-garī

nuur kā Dorā savād-e-chashm-e-sozan meñ nahīñ

is qadar piisā zamāne ne mujhe 'sho.ala' ki ab

ek daana bhī mirī qismat kā ḳhirman meñ nahīñ

irtibaat-e-bahami shaiKH-o-barahman mein nahin

jo maza hai mil ke rahne mein wo an-ban mein nahin

nala-sanji-e-anadil se ye chalta hai pata

nam ko bu-e-wafa arbab-e-gulshan mein nahin

dair-o-kaba ki parastish phir bhala kis kaam ki

jab KHulus-e-bandagi shaiKH-o-barahman mein nahin

phir khaTakte hain nigah-e-baghban mein kis liye

KHair se ab chaar tinke bhi nasheman mein nahin

umr bhar mujh ko jala ke sham-o-gul kyun lae ab

dagh-e-dil ki raushni kya mere madfan mein nahin

phir taDap kar bar bar aati hai bijli kis liye

ek tinka bhi to ab mere nasheman mein nahin

apne dil ki aap ne pahnaiyan dekhin kahan

aisi wusat to qayamat ke bhi daman mein nahin

hath sine par na rakkho ho chuka qissa tamam

ab koi aawaz mere dil ki dhaDkan mein nahin

hain sabaq-amoz auraq-e-kitab-e-gul magar

juz fareb-e-rang-o-bu kuchh un ke daman mein nahin

dekh kar wo zaKHm-e-dil ki karti kya baKHiya-gari

nur ka Dora sawad-e-chashm-e-sozan mein nahin

is qadar pisa zamane ne mujhe 'shoala' ki ab

ek dana bhi meri qismat ka KHirman mein nahin