is aas par ki udasi kisi Thikane lage

is aas par ki udāsī kisī Thikāne lage

globe rakh liyā Table pe aur ghumāne lage

'ajīb dukh hai tire haath piile hone se

hamāre ḳhvāb meñ kaale gulāb aane lage

kahīñ se abr na aayā to ehtijāj meñ ham

barahna ho ga.e aur dhuup meñ nahāne lage

galī meñ ek taraf boriyā bichhā liyā thā

hamāre haath nahīñ the magar kamāne lage

hameñ ḳhazāna nahīñ chhāñv chāhiye thī so ham

tirī girī huī dīvār ko uThāne lage

ye ham se ho gayā thā ham ne ḳhud kiyā nahīñ thā

kisī ne phuul diyā ham use chabāne lage

vo sair-gāh meñ bas sarsarī dikhā.ī diyā

ḳhayāl-gāh meñ kuchh she'r sarsarāne lage

mujhe bulāyā gayā pul-sirāt se guzro

farishte hañsne lage sīTiyāñ bajāne lage

is aas par ki udasi kisi Thikane lage

globe rakh liya Table pe aur ghumane lage

'ajib dukh hai tere hath pile hone se

hamare KHwab mein kale gulab aane lage

kahin se abr na aaya to ehtijaj mein hum

barahna ho gae aur dhup mein nahane lage

gali mein ek taraf boriya bichha liya tha

hamare hath nahin the magar kamane lage

hamein KHazana nahin chhanw chahiye thi so hum

teri giri hui diwar ko uThane lage

ye hum se ho gaya tha hum ne KHud kiya nahin tha

kisi ne phul diya hum use chabane lage

wo sair-gah mein bas sarsari dikhai diya

KHayal-gah mein kuchh she'r sarsarane lage

mujhe bulaya gaya pul-siraat se guzro

farishte hansne lage siTiyan bajaane lage