is ahd-e-taraqqi ka andaz nirala hai

is ahd-e-taraqqī kā andāz nirālā hai

bastī meñ añdherā hai sahrā meñ ujālā hai

auroñ ko bhī lutf aa.e yuuñ raah meñ Daalā hai

kāñTā jo abhī ham ne pairoñ se nikālā hai

āsāñ hai masāfat bhī hai shaġhl-e-ibādat bhī

har moḌ pe raste ke ab ek shivālā hai

tum kuchh bhī karo tum par kuchh aañch na aa.egī

inkār kā aala bhī kyā kaam kā aala hai

ham laakh machā.eñ ġhul suntā hī nahīñ apnī

tum bolo to khul jaa.e kyā ḳhuub ye taalā hai

larzāñ haiñ qadam apne ab ham ko sañbhāle kaun

ham ne to yahāñ kitne girtoñ ko sañbhālā hai

lagtī hai usī din se mahfil tirī be-raunaq

dīvāne ko jis din se mahfil se nikālā hai

be-vaqt kī ye āñdhī be-vaqt kī ye bārish

āsār batāte haiñ kuchh hone hī vaalā hai

urdu ke liye va.ada bahlāve pe bahlāvā

lagtā hai 'musavvir' ab kuchh daal meñ kaalā hai

is ahd-e-taraqqi ka andaz nirala hai

basti mein andhera hai sahra mein ujala hai

auron ko bhi lutf aae yun rah mein Dala hai

kanTa jo abhi hum ne pairon se nikala hai

aasan hai masafat bhi hai shaghl-e-ibaadat bhi

har moD pe raste ke ab ek shiwala hai

tum kuchh bhi karo tum par kuchh aanch na aaegi

inkar ka aala bhi kya kaam ka aala hai

hum lakh machaen ghul sunta hi nahin apni

tum bolo to khul jae kya KHub ye tala hai

larzan hain qadam apne ab hum ko sanbhaale kaun

hum ne to yahan kitne girton ko sanbhaala hai

lagti hai usi din se mahfil teri be-raunaq

diwane ko jis din se mahfil se nikala hai

be-waqt ki ye aandhi be-waqt ki ye barish

aasar batate hain kuchh hone hi wala hai

urdu ke liye wada bahlawe pe bahlawa

lagta hai 'musawwir' ab kuchh dal mein kala hai