is baras KHoshon ke dane khet mil kar kha gae

is baras ḳhoshoñ ke daane khet mil kar khā ga.e

sīpiyāñ baaqī rahīñ motī samundar khā ga.e

ab fazā meñ DhūñDte rahiye vo paikar ab kahāñ

kaise kaise dil-nashīñ chehroñ ko manzar khā ga.e

paar jo utre vahī apnī kahānī kah sake

kaun jaane kashtiyāñ kitnī samundar khā ga.e

bhiiḌ meñ jab tak rahe shāmil rahe mahfūz ham

bhiiḌ se bach kar zarā nikle to patthar khā ga.e

jin ko qismat ne banāyā ban ga.e vo kuchh se kuchh

kyā kareñ vo jin kī tadbīreñ muqaddar khā ga.e

ab ḳhudā jaane masīhā kis liye ḳhāmosh haiñ

shor to ye hai ki bīmāroñ ko bistar khā ga.e

ehtiyātoñ par bhī 'afzal' laġhzisheñ haiñ nā-guzīr

har qadam par dekhte chalte bhī Thokar khā ga.e

is baras KHoshon ke dane khet mil kar kha gae

sipiyan baqi rahin moti samundar kha gae

ab faza mein DhunDte rahiye wo paikar ab kahan

kaise kaise dil-nashin chehron ko manzar kha gae

par jo utre wahi apni kahani kah sake

kaun jaane kashtiyan kitni samundar kha gae

bhiD mein jab tak rahe shamil rahe mahfuz hum

bhiD se bach kar zara nikle to patthar kha gae

jin ko qismat ne banaya ban gae wo kuchh se kuchh

kya karen wo jin ki tadbiren muqaddar kha gae

ab KHuda jaane masiha kis liye KHamosh hain

shor to ye hai ki bimaron ko bistar kha gae

ehtiyaton par bhi 'afzal' laghzishen hain na-guzir

har qadam par dekhte chalte bhi Thokar kha gae