is bhare shahr mein tanha hum the

is bhare shahr meñ tanhā ham the

yā'nī ḳhud apne shanāsā ham the

TūTte lamhoñ kā ik karb liye

apne hone kā tamāshā ham the

ḳhaak meñ mil ke bhī raushan the bahut

kyā kaheñ kis kā ujālā ham the

Dūbtī shaam ke hamrāh yahāñ

Duub jaane kā salīqa ham the

tū ne ḳhud ham ko salībeñ baḳhshīñ

zindagī tere masīhā ham the

dard ko harf banāne meñ yahāñ

log kahte haiñ ki yaktā ham the

uḌ ga.e ban ke ġhubār-e-ranjish

kyā kisī yaad kā chehrā ham the

jalte lafzoñ kī tamāzat meñ 'shakīl'

apnī āvāz kā saaya ham the

is bhare shahr mein tanha hum the

ya'ni KHud apne shanasa hum the

TuTte lamhon ka ek karb liye

apne hone ka tamasha hum the

KHak mein mil ke bhi raushan the bahut

kya kahen kis ka ujala hum the

Dubti sham ke hamrah yahan

Dub jaane ka saliqa hum the

tu ne KHud hum ko saliben baKHshin

zindagi tere masiha hum the

dard ko harf banane mein yahan

log kahte hain ki yakta hum the

uD gae ban ke ghubar-e-ranjish

kya kisi yaad ka chehra hum the

jalte lafzon ki tamazat mein 'shakil'

apni aawaz ka saya hum the