is bhul mein na rah ki ye jhonke hawa ke hain

is bhuul meñ na rah ki ye jhoñke havā ke haiñ

tevar to un ke dekh zarā kis balā ke haiñ

kyā mājrā hai ai but-e-tauba-shikan ki aaj

charche tirī galī meñ kisī pārsā ke haiñ

is chashm-e-nīm-vā kī hai mastī sharāb meñ

sāġhar meñ saare rañg usī kī hayā ke haiñ

hastī kī qaid kāTte rahte haiñ rāt-din

kyā jaane kitne saal hamārī sazā ke haiñ

ai shaiḳh kyā Darātā hai maidān-e-hashr se

ham bandagān-e-ḳhalq bhī bande ḳhudā ke haiñ

hai ḳhauf kuchh to mauj-e-talātum kā bhī magar

ham log zaḳhm-ḳhurda but-e-nāḳhudā ke haiñ

rahnā paḌā hai duur karachi se varna ham

is shahr-e-be-misāl ke āshiq sadā ke haiñ

raa.ij raheñge shahr-e-suḳhan meñ hamāre sher

sikke haiñ ye khare ki ye qisse vafā ke haiñ

rakhtā hai ik salīqa-e-iz.hār muḳhtalif

sab mo'tarif 'ḳhalīl' kī tarz-e-adā ke haiñ

is bhul mein na rah ki ye jhonke hawa ke hain

tewar to un ke dekh zara kis bala ke hain

kya majra hai ai but-e-tauba-shikan ki aaj

charche teri gali mein kisi parsa ke hain

is chashm-e-nim-wa ki hai masti sharab mein

saghar mein sare rang usi ki haya ke hain

hasti ki qaid kaTte rahte hain raat-din

kya jaane kitne sal hamari saza ke hain

ai shaiKH kya Daraata hai maidan-e-hashr se

hum bandagan-e-KHalq bhi bande KHuda ke hain

hai KHauf kuchh to mauj-e-talatum ka bhi magar

hum log zaKHm-KHurda but-e-naKHuda ke hain

rahna paDa hai dur karachi se warna hum

is shahr-e-be-misal ke aashiq sada ke hain

raij rahenge shahr-e-suKHan mein hamare sher

sikke hain ye khare ki ye qisse wafa ke hain

rakhta hai ek saliqa-e-izhaar muKHtalif

sab mo'tarif 'KHalil' ki tarz-e-ada ke hain