is chaman-zar ko sahra na banao yaro

is chaman-zār ko sahrā na banāo yaaro

apne hāthoñ se nasheman na jalāo yaaro

choT lagte hī bikhar jā.egā ā.īna-e-dil

sang-dil mat bano patthar na uThāo yaaro

us ne chāhā to liyā kaam abābīloñ se

us ke darbār meñ sar apnā jhukāo yaaro

darj tārīḳh ke aurāq meñ honā hai tumheñ

is qadar ḳhud ko na majbūr banāo yaaro

azmat-e-ḳhāk-e-vatan par na kahīñ harf aa.e

hai vatan ḳhatre meñ ab hosh meñ aao yaaro

mujh ko hai ḳhauf ki aañsū na baras jaa.eñ kahīñ

shīsha-e-dil ko na tum Thes lagāo yaaro

Duube kashtī na kahīñ 'dāġh' ke armānoñ kī

bahr-e-jazbāt meñ tūfān uThāo yaaro

is chaman-zar ko sahra na banao yaro

apne hathon se nasheman na jalao yaro

choT lagte hi bikhar jaega aaina-e-dil

sang-dil mat bano patthar na uThao yaro

us ne chaha to liya kaam ababilon se

us ke darbar mein sar apna jhukao yaro

darj tariKH ke auraq mein hona hai tumhein

is qadar KHud ko na majbur banao yaro

azmat-e-KHak-e-watan par na kahin harf aae

hai watan KHatre mein ab hosh mein aao yaro

mujh ko hai KHauf ki aansu na baras jaen kahin

shisha-e-dil ko na tum Thes lagao yaro

Dube kashti na kahin 'dagh' ke armanon ki

bahr-e-jazbaat mein tufan uThao yaro