is darja hai kyon mujh pe inayat koi puchhe

is darja hai kyoñ mujh pe ināyat koī pūchhe

kyā ab hai mire sar kī zarūrat koī pūchhe

kyā ho ga.ī aapas kī mohabbat koī pūchhe

kab luT ga.ī is shahr kī hurmat koī pūchhe

kyā sirf ḳhudā hī ko ḳhudā kahte haiñ ye log

kyoñ Dhaa.ī hai in logoñ pe aafat koī pūchhe

aivān-e-siyāsat ke jharokoñ se palaT kar

mujh se to mire des kī hālat koī pūchhe

ma.abūd ke bandoñ kī balī chaḌhtī hai din-rāt

kyā aise bhī hotī hai ibādat koī pūchhe

kab tak yahāñ ye misr kā bāzār lagegā

mujh se bhī to āḳhir mirī qīmat koī pūchhe

sahrā meñ koī dekhe mire sabr kī vus.at

dariyā se mirī pyaas kī shiddat koī pūchhe

jo sub.h ke taare kī tarah Duub rahā ho

kaash us se añdheroñ kī masāfat koī pūchhe

jab vaqt ko muTThī meñ jakaḌ hī nahīñ sakte

kyoñ karte hoñ lamhoñ kī hifāzat koī pūchhe

maġhrib meñ haiñ ḳhud haath haiñ mashriq kī kaloñ par

in nafs ke bandoñ se jasāmat koī pūchhe

har samt se hai sirf namak-pāshoñ kī yalġhār

mujh se mire zaḳhmoñ kī malāhat koī pūchhe

har chiiz dikhā dete haiñ ye āñkhoñ ke rauzan

kab chhuptī hai andar kī kudūrat koī pūchhe

jis peḌ ke saa.e meñ zamīñ rahtī hai ThanDī

us se kabhī sūraj kī tamāzat koī pūchhe

har shaḳhs hī bīmār hai is shahr meñ 'naqvī'

kis kis se bhalā us kī tabī.at koī pūchhe

is darja hai kyon mujh pe inayat koi puchhe

kya ab hai mere sar ki zarurat koi puchhe

kya ho gai aapas ki mohabbat koi puchhe

kab luT gai is shahr ki hurmat koi puchhe

kya sirf KHuda hi ko KHuda kahte hain ye log

kyon Dhai hai in logon pe aafat koi puchhe

aiwan-e-siyasat ke jharokon se palaT kar

mujh se to mere des ki haalat koi puchhe

mabud ke bandon ki bali chaDhti hai din-raat

kya aise bhi hoti hai ibaadat koi puchhe

kab tak yahan ye misr ka bazar lagega

mujh se bhi to aaKHir meri qimat koi puchhe

sahra mein koi dekhe mere sabr ki wusat

dariya se meri pyas ki shiddat koi puchhe

jo subh ke tare ki tarah Dub raha ho

kash us se andheron ki masafat koi puchhe

jab waqt ko muTThi mein jakaD hi nahin sakte

kyon karte hon lamhon ki hifazat koi puchhe

maghrib mein hain KHud hath hain mashriq ki kalon par

in nafs ke bandon se jasamat koi puchhe

har samt se hai sirf namak-pashon ki yalghaar

mujh se mere zaKHmon ki malahat koi puchhe

har chiz dikha dete hain ye aankhon ke rauzan

kab chhupti hai andar ki kudurat koi puchhe

jis peD ke sae mein zamin rahti hai ThanDi

us se kabhi suraj ki tamazat koi puchhe

har shaKHs hi bimar hai is shahr mein 'naqwi'

kis kis se bhala us ki tabiat koi puchhe