is darja tere ishq mein andohgin hun main

is darja tere ishq meñ andohgīñ huuñ maiñ

dil se kahīñ ḳhayāl kahīñ aur kahīñ huuñ maiñ

is tarah kho gayā huuñ tajallī meñ aap kī

mahsūs ho rahā hai ki jaise nahīñ huuñ maiñ

bas ārzū-e-dīd kī takmīl chāhiye

aa jā.iye shikār-e-dam-e-vāpsīñ huuñ maiñ

maanā ġham-e-hayāt meñ hosh uḌ ga.e mire

phir bhī tumhārī yaad se ġhāfil nahīñ huuñ maiñ

kyoñ āstān-e-yār pe jhuk kar na uTh sakā

sajda-guzār huuñ ki sarāpā jabīñ huuñ maiñ

maiñ ne kahā ki maiñ huuñ mohabbat kā āftāb

us ne kahā ki husn kā māh-e-mubīñ huuñ maiñ

jo rāh-e-āshtī se haTā deñ 'muhib' mujhe

aise tasavvurāt kā qaa.il nahīñ huuñ maiñ

is darja tere ishq mein andohgin hun main

dil se kahin KHayal kahin aur kahin hun main

is tarah kho gaya hun tajalli mein aap ki

mahsus ho raha hai ki jaise nahin hun main

bas aarzu-e-did ki takmil chahiye

aa jaiye shikar-e-dam-e-wapsin hun main

mana gham-e-hayat mein hosh uD gae mere

phir bhi tumhaari yaad se ghafil nahin hun main

kyon aastan-e-yar pe jhuk kar na uTh saka

sajda-guzar hun ki sarapa jabin hun main

main ne kaha ki main hun mohabbat ka aaftab

us ne kaha ki husn ka mah-e-mubin hun main

jo rah-e-ashti se haTa den 'muhib' mujhe

aise tasawwuraat ka qail nahin hun main